Mizoram Journalists' Association, Champhai District chuan vawiin khan an din cham kum 25-na, Silver Jubilee chu I&PR Auditorium, CHANEM Building-ah an lawm a. Pu TT Zothansanga, Parliamentary Secretary chu khuallian a ni.
He hun Pu Lalhmingmawia Pachuau, President MJA Champhai District kaihhruaiah hian khuallian Pu TT Zothansanga chuan thu sawiin, MJA Champhai District in kum 25 a thleng ta chu lawmawm a tih thu a sawi a. Chanchinbu hlutna phakhat leh, a that leh that loh tehna pakhat chu editorial hi a ni, editorial quality hian chanchinbu hi a hril thui hle a ni, a ti. Democracy-ah hian lungphum pawimawh tak tak a awm a - Kohhran, Lal leh a khawnbawl te, Mipui vantlang te hi estate tiin an ko thin a. Anni ang bawk hian chanchinbu leh a buatsaihtute hi a pawimawh a ni tih hriain, Fourth Estate tia koh an ni, tih tarlangin, chanchinbu hian khawtlang leh mipui sukthlek hi a hruai nasa hle a, Horace Greely leh Benjamin Franklin te hian chanchibu hmangin America ram sukthlek an lo tidanglam tawh a, Benjamin Franklin phei hi chuan chanchinbu hi America zalenna sual kawnga hmanrua angin a hmang hial a ni, a ti.
Khuallian Pu TT Zothansanga chuan, chanchinbu hian thlei bik nei zawng leh awn lam nei zawnga an berih ran chuan thudikin hmn chang lovin dawt leh zeldin thu hmangin mipuite kawng ni lamah min hruai thei a. Yellow journalism an tih thin, thu a nihphung bak hreta kalpuina ngei pawh Mizoramah hriat tur a awm leh thin a, thil tipunlun zawng leh a tha lo zawngin, chanchinbu hralh tla nih duh vang ngawta dikna leh rinawmna hnuaichhiah a, thudik chanve-a thu kalpui thin hi a pawiin mipui rilru sukthlek pawh a tidanglam thei a ni, a ti a, chanchinbu mi kalkhawmte chu dikna ngai pawimawh ber turin a chah bawk. Khuallian hian Jubilee monument a hawng nghal bawk.
Khualzahawm Pu Jim K.Chozah pawhin thu sawiin, media te hi chi (salt) ang an ni a. Chaw kan ei a, chi a tel loh chuan a kim lo thin ang hian media tel lo chuan mihring nunah hmasawnna leh bengvarna a awm lova, mihring nunphung hi media te hnathawh tel lo hi chuan a kim thei lo a ni, a ti a, chanchinbu mite chu thuziakmi in nih angin chanchinbu-a in thuchhuah reng reng chu record-ah a awm tawh thin a, chu chu hrerengin thuchhuak kawngah fimkhur a tul a. Thudik, mipui sawpui tur leh thatpui tur ngaihtuah a ngai hle a ni, tiin a sawi. Khualzahawm hian MJA Champhai District Silver Jubilee Souvenir a tlangzarh nghal bawk.
Thusawitu dang Champhai District Bawrhsap Pu Zoengsanga pawhin MJA te sorkar nena thawhhona tha tak an neih zel theih theih a beisei thu sawiin, mipui rawngbawl an nih anga an hnathawh kawnga tan la lehzual turn a fuih bawk a. MJA Champhai District Silver Jubilee lawmnaah hian MJA General Hqrs President Pu C.Lalrambuatsaiha leh te pawhin thu an sawi bawk a, MJA member hlun chawimawina leh member boralte sunna hun an hmang a, tlaiah chawhlui an kilho nghal a ni.
