4153/2023-2024
2024 Vau thla ni 13: Vawiin chawhnu dar 1:30 khan Kolasib DC Conference Hall-ah Kolasib District Bawrhsap Pu John LT Sanga kaihhruaiin Kolasib District chhunga national highway kawngpui (main road) siam ṭhat dan tur chungchangah ṭhut khawm buatsaih a ni.
He hunah hian PWD National Highway Division-III hotute, NHIDCL hotute, contractor-te, YMA, MHIP, MUP leh Kolasib Development Committee ai awhte, Mizoram Tipper Association, Kolasib Sub-Headquarters leh Maxi Cab ai awhte an tel a ni.
Bawrhsap Pu John LT Sanga chuan Kolasib District chu Assam nena inri, Mizoramin chak kan lakna kawngpuiin a pal tlang a nih thu sawiin, District chhunga national highway kawngpuite chu a enkawlna kawngah chak taka hma lak a ṭul tih a sawi a. Hma lakna chak tak a awm theih nana an ngaihtuahna seng turin kal khawmte chu a chah a ni.
Kolasib Development Committee hruaitute chuan Kolasib District chhunga national highway kawng chhe lutuk an vei avanga hma an lak dan tar langin, contractor-te chu fur ruahtui tlak hma, March 2024 chhunga an kawng siamte zo tura an hriattir thu te an tar lang a. Kolasib Sub-Headquarters YMA hruaitute pawhin contractor-te hi March ni 31 thleng kawng siam ṭha tura hun an pek thu te, national highway bakah, Kolasib District chhunga kawng siam mek hmun hrang hranga mi an tlawh thu te an sawi bawk.
PWD National Highway Division-III-a Senior Executive Engineer Er R. Lalduhthlanga chuan Bilkhawthlir to Kolasib inkar chu Sadguru te'n an siam thu sawiin, Kawnpui - Khamrang pawh Sadguru te'n an thawh thu a sawi a. Khamrang - Buichali chu contractor an ban (terminate) avanga a khuar zualpui department lamin an hnawh mek thu te a sawi a. Kawng chhiat chungchangah hian PWD lamin hma an lak ngawt theih loh thu sawiin, contractor-te chu siam tura hriattirna lehkha an pek thu te, contractor-te nen meeting te pawh an neih ṭhin thu te a sawi a. Contractor-te an chet hleihtheih loh avanga PWD-in an hnawh thu sawiin, Dispute Notice an hmuh avanga hma lak a harsat thu te a sawi a. Bilkhawthlir aṭanga Kolasib Leitan inkar siamtu contractor-te chuan MP inthlan zawh hmain siam an intiam thu a sawi lang bawk.
Contractor-te chuan lung hman tur chungchanga harsatna an tawh dan bakah, harsatna an neih hrang hrangte an sawi lang a. Kolasib District chhung hmun hrang hranga kawng siam ṭhat hna chu a thawktute'n fur ruahtui tlak hmaa thawk zo hman ngei turin hma la se, tih a ni.
Meeting-ah hian Kolasib Vengthar Leitan bula kawng thlang lam lungrem (retaining wall) chim, tun thlenga la siam ṭhat loh chungchang pawh sawi lan a ni a. NHIDCL lam chuan kum hnih dawn nghah a ngaih chhan chu a siam dan tur ruahmanna (design) te siam a, hotu sang zawkte pawmpuina nghah a ngaih vang a nih thu an sawi a. Tunah chuan pawmpuina (approval) an hmuh tawh thu leh hna thawk tur pawh an thlan fel tawh thu sawiin, hna pawh ni 10 chhunga ṭan theih an beisei thu an sawi.
Attachment
- Loading attachment...
