Vawiin khan Health Minister Pu Lal Thanzara chuan MHIP Sub-Headquarters Kolasib buatsaih pseudoephedrine (metamphetamine) chungchang zirhona, Synod Book Room Conference Hall, Diakkawn a neih chu a hmanpui.

Pu Lal Thanzara chuan sum ngainatna leh awlsam taka sum lakluh duh luattukna avang hian midangte tana chhiatna a thlen tur pawh haider lui a, hlawkna ringawt uma tlan kan awm thin hi a pawi hle a ni, a ti a. Tunlaia Mizorama lar tak khehpuam pawh ruihhlo siamna hmanrua a nih hre reng mahse mi thenkhat chuan hausak thut duh avangin an bansan thei lova, a tawpah chuan chhiatna rapthlak tak a thlen thin a ni, a ti. Health Minister chuan Mizo mipuiten hriselna kawnga hma kan sawn theihna tura sorkar hmalakna leh hmachhawp thenkhat a tarlang a. Chung zingah chuan man tlawm zawka mipuite’n damdawi kan lei theihna tur, Civil Hospital-a generic drug store siam tum a nih thu te, Mizoram puma Sub-Centre te internet hmanga thlun zawma a nih tur thu leh a thlawna damdawi lei theihna CM’s free medicine scheme kalpui a nih tur thu te, Kulikawna Mental hospital sakna tur sum sanction a nih tawh thu te a sawi a. Hei bakah hian Aizawl Civil Hospital-ah kum lama upate tan khum 10 awmna ward siam a nih tur thu te, Cabin pawh room siam belh a nih tur thu te, kumin chhung ngeia medical college tan hman beisei a nih thu te bakah Doctor leh Nurse pawh engemawzat lak belh an nih tur thu a sawi a ni.

Thisen hralh anga sawi awm thin chungchang pawh sawifiahin Health Minister chuan a thlawna mi tlawmngaite thisen pek hralh chhawnga sum la lut ni awm a sawi chu thu diklo hulhual a ni, a ti a. Damlo hman theih tura thisen sawngbawl leh tihthianghlimna senso chu unit khat zelah Rs. 1,500/- a ni a, NACO in thisen sawngbawlna mamawh a thlawna a pek thin a tihtawp tak vang leh state tin te 25% chawi ve tura a phut avangin sorkarin harsatna a tawk a, he harsatna hi Mizoram chauh nilo state lian zawkte pawhin an tawk ve tho niin Pu Lal Thanzara chuan a sawi. Sorkar flagship programme NLUP chungchang pawh sawiin hei hi mi retheite’n lei rem an rah theihna tura sorkar ruahmanna a ni a, tlawmngai pawlte nen tang hovin a hlawhtlinna hmuh chhoh mek a ni a, UNO pawhin hei hi hriain a hlawhtlin ngei theih nan an agency hrang hrang te kaltlangin a thawhpui a ni, a ti bawk.

MHIP Sub-Hqrs President Pi Laltluangi kaihhruai pseudoephedrine (metamphetamine) chungchang zirhona programme ah hian Food & Drugs Administration Joint Director Pu Lalsawma Pachuau, Superintendent Excise & Narcotics Pu Z. Lalhmangaiha leh Special Judge, District Council Court Pi Lucy Lalrinthari te’n thupui thlan bik hmangin thu an sawi a ni.