1984/2024-2025

Dated Kolasib the 10th September, 2024: Vawiin khan I&PR Conference Hall Kolasib-ah International Literacy Day 2024 puala hun hman a ni a. He hun hi Kolasib DC Pu Robert C Lalhmangaiha chuan khuallian niin a hman pui.

He huna khuallian Kolasib DC, Pu Robert C Lalhmangaiha chuan thu sawiin, ziak leh chhiar lama hma kan sawn theih nan sawrkarin kawng chi hrang hrangin hma a la a, chumi rahchhuah chu Mizoramah ngei pawh Literacy rate 91.58% hial kan thlen phah a ni, a ti a. Chu kan ziak leh chhiar thiamnaah chuan duhtawk mai lova kawng hrang hranga hman tangkai dan tur kan hriat a ngai a ni, a ti bawk. 

DC chuan multilingual Education a pawimawh zia sawiin, Mizo tawng mai bakah tawng chi hrang hrang, a bikin Hindi kan thiam a pawimawh hle a. Chu chuan kan hun kal tur zelah pawimawhna nasa tak a nei a ni, a ti. Zirlai kalkhawmte chu an hma hun atan duhsakna a hlan bawk.

Khuallianin thusawina a neih zawh hian Pu David A Lalhmingchhuana, DIPRO Kolasib leh Pu Lalthianghlima, National Teacher Awardee 2023 te'n fuihna thu tawi sawina hun an hmang a. Program zawh hian hemi ni puala essay writing competition lawmman semna neih a ni nghal bawk.

Kumin International Literacy Day thupui atan hian ‘Promoting Multilingual Education: Literacy for mutual understanding and peace" tih chu hman a ni a; Kolasib-a International Literacy Day puala hun hman hi Pi Elizabeth Lalmuankimi, District Mission Co Ordinator, Mission Shakti Pi Zonunpuii, SFL Mission Shakti chuan lawmthu sawina a neih hnu in program hi tih tawp a ni.

International Literacy Day pual hian Essay Writing Competition neih a ni a. Lawmman pakhatna High School Category-ah dawngtu chu K Lalmuansangi, St John Hr Sec School Kolasib niin, Middle School ah Thianawi, Govt Middle School, Kolasib chu pakhatna a ni a. PM Shri Govt PS III, Kawnpui chu Primary level-a Drawing and Slogan Writing Competition-ah pakhatna an ni ve thung.