1983/2024-2025

Dated Aizawl, the 10th September 2024: Vawiin chawhma dar 11:00 khan Institute of Advanced Studies in Education (IASE), Republic Veng chuan M.Ed leh B.Ed zir chhuak zirlai tithate chawimawina hun chu IASE Auditorium, Republic veng, Aizawlah an hmang a. He hun hi  Pu C. Lalsawivunga, LAD Minister leh bialtu MLA ni bawk chuan khuallian niin a hmanpui a, zirlai tithate chawimawina thilpek a hlan bakah IASE Annual Magazine 2024 ‘Vartian’ a tlangzarh nghal bawk a ni.

Kalkhawmte hmaah hian khuallian Pu C. Lalsawivunga chuan zirna chu ram leh hnam hmasawnna bul a nih zia leh, a phena thiamna tak tak neih a pawimawh thu sawiin, zirlaite chu chhawr tlak thiamna zir chhuak ngei turin a chah a. Tunlai khawvelah chuan zir chhuah satliah mai chu a tawk tawh loh thu leh chumi atan chuan inchher hriam zel turin a chah nghal bawk a. Rinawmna vawng nung zel turte leh Pathian tihna nen ram leh hnam hmasawnna atana an thiamna leh finnate hmang turin a fuih a; an kalzelna turah duhsakna a hlan nghal bawk a ni.

Hun hman hi Dr. Zairemmawia Renthlei, Dean, Student's Welfare Committee, IASE chuan kaihruaiin Prof. Lallianzuali Fanai, Principal, IASE chuan kalkhawmte lawmna thu a sawi rualin zirnaa IASE dinhmun a tarlang nghal bawk a. Hemi zawh hian zirlai hlawhtlingte hnenah khuallianin chawimawina thilpek a hlan a, IASE Annual magazine, 'Vartian' chu a tlangzarh nghal bawk a ni.

Tun dinhmunah IASE-ah hian B.Ed zirlai mi 300, M.Ed zirlai mi 60 leh Ph.D zirlai mi 36 an awm mek a. Kum tinin mi 150 velin B.Ed hi an pass chhuak thin a, M.Ed pass chhuak mi 40 vel an awm ziah bawk a ni. Kumin University exam result chhuakah khan IASE-a zirlaite hian result tha tak neiin, M.Ed-ah 100% pass-in B.Ed-ah 99.2% an pass a, pass chhuakte zingah University Top 10, rank holder engemawzat awmin, M.Ed leh B.Ed Topper-te hi IASE zirlaite an ni nghe nghe a ni.