1982/2024-2025

Siaha the 10th September, 2024: Vawiin chawhma Dar 11 khan DC Mini Conference Hall, Siaha-ah Addl DC Pu Abraham Beirazi Khithie kaihhruaina hnuaiah Swachhata Hi Seva 2024 hmalakna tur (action plan) relin ‘District Level Steering Committee on Swachhata Hi Seva’ te an thukhawm.

UD&PA hnuaia DAY-NULM District Project Officer, SDO (S) ni bawk Pu Vanlalchhuanliana chuan Swachhata Hi Seva (SHS) chu faina kawnga beihpui thlakna a ni tiin India ram pumah kar 2 chhung, September ni 14 atanga October ni 1 thleng hman tura ruahman a ni a. October Ni 2 2024 a Swachh Bharat Mission hman tur urlawkna a ni, a ti. Faina chu mitin mawhphurhna a ni thu kan hriat tlan theih nan te, mipui thinlungah faina tuha a awm tlat theih nan te, khawchhunga hnawm hnawk tam zualna (black spots) thenfai a, sanitation workers-te tawiawm tur leh hun lo kal zel turah pawh fai lehzual tura inzirtirna beihpui thlakna a nih thu a sawi. DPO chuan hmalak tawhna leh hmachhawp an neih te tarlangin Siaha District bikah chuan September ni 18 atanga October ni 1 thleng hman tur a nih thu a tarlang a, kalkhawmte chu thahnemngai taka thawhho puiah a sawm nghal bawk. SHS hnuaia pillar 3- Swachhata Ki Bhaagidari, Sampoorna Swachhata leh SafaiMitra Suraksha Shivir a awm thu tarlan niin heng pillar 3 hnuaia hmalakna tur te leh department theuh chanpual tur te vawiin meeting chuan a rel nghal a ni.

Vawiin meeting chuan Siaha khawpui a lo thianghlim a, a lo fai zel nan veng tin VC te NGO te thawhho puiah sawm ni se a ti a, SHS 2024 denchhanin khawpui tihfai kawngah nasa lehzuala tan lak ni se tiin essay writing competition, wall painting, pledge taking, swachh marathon, awareness among school students etc neih ni se a ti bawk a, Siaha khawpui faina endiktu atan Inspection team-te ruat felin an ni hian vengchhung faina an endik thin dawn a ni.

Vawiin meeting-ah hian sawrkar department hotute bakah NGO lam atangin MTP, MCHP, Joint VC aiawhte an tel bawk. ‎