1985/2024-2025

Aizawl, 10.09.2024: State Election Commission thuchhuak angin Sinlung Hills Council, 2024 Summary Revision neih tur atan Draft Electoral Roll chu vawiin khan Aizawl Bawrhsap, District Election Officer ni bawk Er. Lahriatpuia chuan DC Conference Hall-ah mipuite en theih turin a tlangzarh.

Sinlung Hills Council ah hian Constituency 6 awmin Polling Station 19 a awm a. October ni 1, 2024 a kum 18 tling tawh chin te electoral roll ah hian thun theih an ni dawn a. September ni 11 - 17, 2024 chhung hian hming thunluh ngai, paih ngai leh siamthat ngaite tan dilna hun hawn a ni dawn a. Heng dilna lutte hi September ni 18 – 23, 2024 chhungin ERO/AERO ten a hmunah kalin enfiahna an nei ang. Electoral Roll te hi ni September ni 24 – 28, 2024 chhunga peihfela print an ni ang a. Sinlung Hills Council General Election a hman tur final Electoral Roll chu ni September ni 30, 2024 ah tlangzarh a tarchhuah a ni ang.

Aizawl DC chuan Sinlung Hills Council Electoral Rolls, 2024 Summary Revision chu tluang tak leh hlawhtling taka neih a nih theih nana fimkhur tak leh thahnemngai taka thawk tur in ERO, AERO leh BLO, Village Council, Political Parties leh tlawmngai pawl hrang hrangte a sawm a. Sinlung Hills Council Electoral Roll hi Sinlung Hills General Election atana hman tur a nih angin MLA roll nen a in ang lo va, ngaih fin loh tur a nih thu a sawi bawk.

Electoral Roll siamthatna (Summary Revision) neih tur atan hian Pu Mark Lalthanliana, ADC, Aizawl chu Electoral Registration Officer atan ruat niin Pu N. Lalzarzova, SDO (C) Sakawrdai leh Pi Malsawmhriatzuali, BDO Thingsulthliah te chu AERO atan ruat an ni bawk.

Sinlung Hills Council Electoral Roll Draft Publication a Elector awmzat chu 10,458 niin mipa 5189 leh hmeichhia 5269 an ni a, mipa aia hmeichhia an tamna chu 80 a ni. Voter tlemna ber Polling Station chu Upper Sakawrdai Polling Station niin Voter 104 an awm a, Voter tamna ber chu Sakawrdai-I Polling Station niin Voter 1134 an awm.