2634/2023-2024

2023 Sahmulphah thla ni 3: Mizoram Legislative Assembly Inthlanpui, 2023 lo awm tur atana Kolasib District chhunga assembly bial pathum - 4-Tuirial, 5-Kolasib leh 6-Serlui biala inthlan buaipui tura ruat Presiding Officer (PRO) leh 1st Polling Officer (APRO) te tan vawiin khan Government Kolasib College-ah training thawh thumna buatsaih a ni.

He training-ah hian State/District/Assembly Level Master Trainer pathum - Pu Lalremruata Sailo, SDO (Civil) Vairengte; Dr Lalramdintluanga, SDC Kolasib leh Pu Samuel Lalrinawma, Lecturer, DIET Kolasib te'n training hi an pe a. Form hrang hrang hman dan leh EVM hman dan te a takin an zir ho bawk a. Training-naah hian postal ballot vote thlakna facilitation centre buatsaih nghal niin, polling official zinga vote la thlak lo Kolasib District chhunga vote nei leh Kolasib District pawn lama vote neite chuan postal ballot-in vote an thlak nghal a ni.

Kolasib District chhunga assembly bial pathuma polling station 89 awmah inthlan buaipui turin PRO 1 leh PO 3 ṭheuh ruat an ni a. Thlaveng atan reserve mi eng emaw zat ruat tel an ni bawk a. Election Commission of India-in ruahmanna a siam angin duty dan tur thliar felna (randomisation) ṭum hnih buatsaih tawh niin, team khata awm ho (inkawp) turte leh an kalna tur constituency chu an inhre tawh a. An kalna tur polling station erawh chu November ni 5, 2023 (Pathianni)-a 3rd randomisation neih hnuah a hriat dawn chauh a ni.