Cheng nuai 502.73 senga sak Khuangpuilam, Kolasib-a Judicial Officer leh Staff Quarters thar chu vawiin khan Gauhati  High Court Judge Justice Michael Zothankhuma’n a hawng.  

Judicial Quarters hawnna inkhawm Chief Judicial Magistrate, Kolasib District Pi Sylvie Zomuanpuii Ralte kaihhruaiah Justice Michael Zothankhuma chuan Mizoram Judiciary chu hmunhma tha neih thatah a la hnufual hle a, Aizawl, Lunglei leh Saiha tih lovah chuan quarters a awm miah lo thu a sawi a. Tunah Kolasib-ah Officer leh Staff Quarters luah theiha sak zawh a ni ta chu lawmawm hle a ni a ti. Ram petu leh a satute bakah tha leh zung thawhtute zawng zawng chungah lawmthu a sawi bawk. Mizo zingah ziak leh chhiar thiam an pun zel avang leh dan kalphung an hriat chhoh zel avangin court case pawh a pung chho zel a, Mizoramah naupang khuaikhem case Prevention of Children from Sexual Offences Act (POCSO) hnuaiah ziahluh a tam thu sawiin Justice Michael Zothankhuma chuan naupangte venhim kawngah tanlak a ngai hle a ni a ti.

Sr. Executive Engineer, PWD Project Division II Pu Lalthanzuala Ralte chuan quarters sak dan report kimchang a pe a. Kolasib-a Judicial Quarters sak nan hian Mizoram sorkar atangin Special Plan hnuaiah cheng nuai 502.73 hmuh a nih thu leh Quarters sak te hi Chief Judicial Magistrate Grade-II; Senior Civil Judge Grade-II; Judicial Staff Quarters Type-II leh Judicial Staff Quarters Type-III te a nih thu a tarlang.

Judicial Quarters hawnna inkhawmah hian District & Sessions Judge, Aizawl Judicial District Pi Lucy Lalrinthari leh Fast Track Court, Kolasib Judge Pu Lalbiakzama bakah Kolasib Deputy Commissioner Dr. Arun. T ten thu an sawi bawk a ni.