Vawiin khan National Bank for Agriculture & Rural Development (NABARD) Mizoram Regional Office chuan NABARD Foundation Day vawi 35-na lawmna ni pahin Self Help Group (SHG) ten Bank a loan an puk theihna leh an inthlunzawmna SGH-Bank Linkage kum 25 tlin lawmna hun State Guest House a an buatsaih a. Programme hi Pi Lal Riliani, Mizorama SHG Patron leh President, Indian Society on Tobacco & Health (ISTM) Mizoram Chapter nibawk in hmanpuiin SHG hmalakna nei tha 3 thlanchhuahte hnenah lawmman an hlan a ni.

Mizoram a SHG Patron Pi Lal Riliani chuan kawng hrang hranga thingtlang mite hmasawnna atana thawktu NABARD in eizawnna kawnga mahni in tun din tum te fuankhawmna Self Help Group kan tih mai te tana bank atanga sum an puk theihna Bank Linkage an siamsakna hian hmeichhia, a bik takin Zokhaw lama chengte tan ei leh bar leh sum dehchhuah kawngah nasa taka a puih thu a sawiin hei hi thil lawmawm tak a ni, a ti a. Mizorama hmeichhia te dinhmun chungchang a sawinaah India hmun hrang hrang leh hmanlai hun ngaihtuahin Mizo hmeichhia te dinhmun hi a zahawmin a tha tawh a, kawng engkimah mipa te tih theih leh thawh thei ang kan ti thei tawh a, mahse Kohhran rawngbawl naah leh politics ah hmeichhia te hi kan tlem a ni, a ti.

SHG te pawimawhna sawiin Pi Lal Riliani chuan SHG kan hman tangkai poh leh kan changkang hma dawn tihna ni a, vawiina SHG ti tha te chawimawina hun kan hman hian SHG dangte hnenah tan lehzualna pe se, in hmalakna leh thlawhhmaa te ti changtlunga tunah ai a nasa leh zawka hmala a, theihtawp chhuah turin ka chah deuh che u, a ti a. Pi Lal Rilianai chuan pawl anga intelkhawmna hi mimal anga kan tih theih loh min tih tir tu a ni tiin, mi tlemte tana hamthatna mai ni lova, member tin ten an that tlan pui theih ang zel tura SHG te kalpui a pawimawh thu a sawi.

SHG hlawhtling ni turin sum khawl a pawimawh thu te, inhmuhkhawm tam a tul thu te, SHG member te sum inpuk kual chu felfai taka kalpui a ngaih thu te, sum puk te chu a hun taka rulh a pawimawh thu te leh lehkha leh sum hman dan reng reng fel taka vawn a ngaih thu te a sawi a. Mizorama SHG te chawmdawl, chawinun leh enkawlna kawngah leh an thawhchhuah a pun a, a than chhoh zel theih nan NABARD, Mizoram State Rural Livelihoods Mission (MzSRLM), North East Rural Livelihoods Mission (NERLP) leh NGO ho te chu an theihna apianga tan laksak turin a ngen a. SHG te Mizorama a lo hlawhtlin zel nan thawhpui zela SHG te tanpui leh kaihruai turin a chah bawk a ni.

SHG Patron Pi Lal Riliani hian SHG hmalakna leh thawk tha pathum thlanchhuah te – Alphonse SHG, Kolasib District (pakhatna); Ruthi SHG, Champhai District (pahnihna) leh Zofa SHG, Serchhip District (pathumna) te hnenah Trophy a hlan a ni.

Vawiina programme ah hian NABARD DGM Pu J. Suresh chuan inlawmna thusawiin Pu R.K. Shrivastava, General Manager, NABARD chuan SHG kalpui dan leh Mizorama SHG te dinhmun chungchang sawiin hun a hmang a. Pi Lalmuanpuii, Chairman, MCAB; Pi Mary. L. Deng GM, RBI te bakah SBI, MRB, MzSRLM leh NERLP hotute ten thusawina hun an nei a ni.

Ram pumah SHG saving bank account nei nuai 85 leh loan la mek nuai 48 vel an awm a, SHG hian mihring nuai 900 vel huam nia chhut a ni. Mizoramah chuan SHG saving bank account nei 8000 leh loan la mek 1400 vel an awm a.

NABARD hian thingtlanga hmasawnna hna hrang hrang thawh nan Rural Infrastructure Development Fund (RIDF) kaltlangin Mizoram Sawrkar vaibelchhe 730 vel a puk tir tawh a. Climate Change Project hnuaia cheng nuai 1000 man project District 5 velah thawh tur an sanctioned tawh bawk a. Lo neitu leh ran vulhtu te tharchhuah a pun an hlawk zawk thei nan hma an la thin bawk a ni.