3195/2023-2024

2023 Pawltlak thla ni 29: Vawiin khan Kolasib DC Conference Hall-ah kumin Krismas leh Kumthar vuakveta Kolasib khawpui chhunga veng hrang hrang kawn leh hmun remchang lai incheisiak buatsaiha lawmmante sem a ni a. Kolasib District Deputy Commissioner (Bawrhsap) Pu John LT Sanga chuan lawmman dawngtute hnenah lawmman hi a hlan a ni.

Bawrhsap Pu John LT Sanga chuan Kristiante hunpui Krismas vuakvetah biak in, khawlai leh mahni chenna in te kan cheimawi ṭhin a, hei hi Krismas kan ngaihhlutzia lantirna pakhat a ni, a ti a. Kolasib-a veng incheisiak buatsaihah kum dang aiin veng hrang hrangin an chei mawiin, an uar zawk nia a hriat thu sawiin, tlawh pawh a hlawh hlea a hriat thu a sawi a. DC Bungalow pawh mawi taka chei a nih thu leh photo booth te siam a nih thu sawiin, DC Bungalow chei hi mipuite'n an tlawh theihna hun remchang siam a nih thu leh tlawhtu pawh ṭhahnem tak an awm thu a sawi a. Nasa taka insengsova Kolasib khawpui mawina tura tha thawhtu veng hrang hrang chungah lawm thu a sawi nghal a ni.

Veng chei endikna hi Sub-Deputy Commissioner Dr Lalramdintluanga convener-na hnuaiah Kolasib ZOOM te'n an kalpui a. Hawi zawng (theme) a nei ṭha em, theme a phawk chhuak fuh em, mipui hlut a hlawh em tih leh tehna hrang hrang hmanga endik a nih hnuah result hi siam a ni.

Kum 2023 Krismas vuakveta Kolasib khawpui chhunga veng incheisiak buatsaiha lawmman dawngtute chu:

1-na: Electric Veng VC - ₹ 20,000/-

2-na: Venglai VC - ₹ 15,000/-

3-na: Ṭumpui VC - ₹ 10,000/-

Consolation Prize: Diakkawn VC - ₹ 5,000/-