2771/2023-2024

2023 Sahmulphah thla ni 9: Vawiin chawhnu khan Kolasib District Election Officer Pu John LT Sanga, 5-Kolasib (ST) Assembly Constituency Returning Officer ni bawk chuan DC Conference Hall-ah thu thar theh darhtute kawmin, Kolasib District chhunga Mizoram Legislative Assembly Inthlanpui, 2023 inthlan buatsaih tak an thlir ho.

Kolasib DEO Pu John LT Sanga chuan Kolasib District chhungah MLA Inthlanpui 2023 inthlan tluang taka zawh fel a ni chu lawmawm a tih thu sawiin, election chu tih than a awm lo va, chet sual palh theihna a tam hle a, chuti chunga inthlan felfai tak buatsaih theih chu a lawmawm zual a ni, a ti a. Inthlan hlawhtling tak buatsaih theih chhan chu official-te, tlawmngai pawl, MPF, media, political party leh District mipuite zavaia thawh hona vang a ni tiin, lawm thu a sawi a. Media-te'n inthlan kaihhnawih an puangzar tha chu lawmawm a tih thu sawiin, an thu chhuah chhiar nuam leh bengvarthlak tak tak avangin lawm thu a hrilh a ni.

He hunah hian DEO hi 4-Tuirial (ST) Assembly Constituency Returning Officer Pi Melody Ngurthantluangi, 6-Serlui (ST) AC Returning Officer Pu Lalmuan Puia, SDO (Sadar), Election Officer, Assistant Returning Officer-te leh DIPRO te'n an tawiawm a. District MJA member eng emaw zat telin, Kolasib District chhunga inthlan kalpui chungchang thlir hovin an sawi ho a ni.

He huna tel MJA member-te chuan District Election Officer Pu John LT Sanga kaihhruaina hnuaia official zawng zawngte hma lakna chu chhuanawm an tih thu leh inthlan an buatsaih dan lungawithlak hlea an hriat thu an sawi a. Kolasib District chhunga inthlan felfai, thianghlim leh muanawm tak buatsaih a ni chu lawmawm an tih thu an sawi a ni.

He hunah hian November ni 7, 2023-a Kolasib District chhunga MLA inthlan kalpui dan sawi ho niin, thil chhinchhiah tlak leh chin zui zel atana tha nia an hriatte an sawi khawm a. Hmasawn theihna tur kawng hrang hrangte sawi hovin, ngaih dan an thawh khawm hlawm a ni.

Kolasib District-a ngaw leh nungcha lam hawi (forest theme)-a chei unique polling station, 5/26-Saidan Polling Station chuan hlut a hlawh hle tih te; intlar ngai lova vote thlak theihna atana ruahman 5/16-Project Veng leh 5/28-Project Veng-II Polling Station-ahte inthlan a felfai zualin, chin zui zel atan a duhawm hle tih te sawi lan niin, District hmunpui atanga polling station hrang hranga thil thleng vil theihna tura 60% polling station webcasting tih leh vote thlak tura polling station pan harsatte tana home voting tih te chu zawngchhangthlak hlea hriat a ni bawk.

November ni 7-a inthlan buatsaih takah khan Kolasib District-a vote awm thei zawng zawng 63,456 (mipa 30,595 leh hmeichhia 32,861) atangin vote thlak nana hman Electoral Voting Machine (EVM)-ah vote 52,637 (mipa 24,954 leh hmeichhia 27,683) a tla a, chu chu 82.95% a ni a. Hriat theih chinah Kolasib District-ah postal ballot vote tla 980 awmin, EVM vote tla nen belh khawmin 53,617 a ni a, hei hi vote awm thei zat (63,456) atangin 84.49% a ni.

Election Commission of India (ECI) atangin thu thar dang a awm a nih loh chuan, MLA Inthlanpui 2023-a Kolasib District chhunga vote tlate hi December ni 3, 2023 (Pathianni) khian Government Kolasib College-a Counting Hall pathumah chhiar a ni ang.