3608/2023-2024

2024 Ramtuk thla ni 1: Vawiin khan I&PR Conference Hall, Kolasib-ah Mizoram State Rural Livelihoods Mission (MzSRLM) hnuaia Kolasib District Mission Management Unit leh Kolasib District Rural Development Office te ṭang kawp huaihawtin mipa leh hmeichhia inthliar hranna tibo tura inzirtirna hun, 'National Campaign Against Gender Discrimination' buatsaih a ni a. Kolasib District Bawrhsap Pu John LT Sanga chuan Khuallian niin hun a hmanpui.

Khuallian Pu John LT Sanga chuan nihna leh dinhmun avanga khawtlanga inthliarna leh inen hranna awm ṭhin chuan harsatna tam tak a thlen tih sawiin, a bik takin, mipa leh hmeichhe inkara inthliar hranna awm ṭhin tihbo a ṭul tih a sawi a. Pathian min siam danah mipa leh hmeichhia intluk tlanga awm tur kan ni tiin, Kristian kan nih ang pawhin mipa leh hmeichhe inthliar hranna a awm tur a ni lo, a ti a. Khawtlang nun hona hrang hrangah mipate'n hmeichhiate hnuaichhiah leh ngaihnepna a awm loh nan mipate'n rilru puthmang dik put a ṭul tiin, in chhungkhur aṭangin hmeichhiate zah thiam inzirtir a pawimawh a ni, a ti.

He hun hi Kolasib DRDO Project Director Pu Lalmuan Puia chuan kaihruaiin, hun hman chhan a sawi fiah a. Rural Development Department hnuaiah eizawnna kawnga hmeichhe intel khawm, self help group eng emaw zat din niin, RD department chuan hmeichhiate chanvo leh hamṭhatna a ngai pawimawh hle a, khawtlanga hmeichhiate nek chepna leh thliar hranna awm ṭhin tibo turin hma lakna hrang hrang a kalpui mek a ni tiin, chumi kal zelah chuan inzirtirna hun pawh chu buatsaih a nih thu a sawi.

He hunah hian St John's HSS leh Govt Chawngfianga MS zirlai naupangte an kal khawm a. Resource person pathum awmin, Kolasib Chief Judicial Magistrate Pi Cacy Malsawmtluangi Ralte chuan hna thawhna hmuna inzar buaina laka hmeichhiate venhimna dan, "Prevention of Sexual Harassment of Women at Workplace (POSH) Act, 2013" chungchang a zirtir a. Kolasib Sub-Divisional Police Officer Pu Joseph Lalremmawia chuan Indian Penal Code (IPC) leh Code of Criminal Procedure (CrPC) hnuaia hmeichhiate kaihhnawih dan chi hrang hrang a zirtir a. Kolasib Sub-Headquarters MHIP President Pi C. Laldinpuii chuan hmeichhiate chanvo, hamṭhatna leh venhimna chungchanga an hma lakna leh tawnhriat hrang hrangte a sawi bawk a. Zawhna leh chhanna leh sawi hona hun hman niin, zaithiam zai te ngaihthlak a ni a. Block Mission Manager Pi Lalhmingchhuangi'n lawm thu sawiin hun a khar a ni.