3607/2023-2024

Aizawl, the 1st February, 2024: Kumin February thla (1-29 Feb, 2024) chhunga hman tur 'Road Safety Month -2024' chu vawiin chhun dar 12:00 khan Mizoram State Road Safety Council buatsaihin Assembly Annexe Conference Hall, Aizawlah hawn a ni. He hun hi Transport Minister Pu Vanlalhlana, Chairman, Mizoram State Road Safety Council chuan khuallian ni a hmanpuiin Road Safety Month, 2024 chu February thla chhunga Mizoram puma hman turin a hawng. Kumin Road Safety Month atan hian 'I him theih nan Traffic Rules-te zawm thin ang che (Obey Traffic Rules for your own safety)' tih chu thupui atan hman a ni.

Khuallian Transport Minister Pu Vanlalhlana chuan Mizoram State Road Safety Council hmalakna hnuaia Mizoram puma lirthei khalhtu leh ke a kalte himna tura uar zawka inzirtirna leh Dan hmanga enfiahna nasa zawka kalpuina tur, 'Road Safety Month, 2024' February thla chhung awh tur hawn a ni ta chu lawmawm a tih thu a sawi a. Road safety month chu sawrkar hmalakna pakhat ang leka hman a nih chuan a hlawhtlin dawn loh thu sawiin, a tihlawhtlingtu nih tum theuh turin lirthei khalhtu, a bikin licence neite thlawpna a ngen a. Mizoram chu mipui cheng awm zat atanga chhuta lirthei chetsualna avanga nunna chan tamna a nih dan tarlangin, kum 2021 leh 2022 dinhmun khaikhinin road accident 92.8% in a pung a, nunna chan pawh 101.79% in a pung a ni, a ti bawk a. Mipuite chu Road Safety Month hman tur pawimawhna hre thar leh a, nunna hlu tak leh sum pai tam tak hlohna chu pumpelh a nih theih nana theihtawp chhuahpuiah a sawm a. Dan hrang hrang zawm tulte tarlangin, himna tura dan siamte tha taka zawm turin a chah nghal bawk.

Sawrkar laipui Ministry of Roads, Transport and Highways-in October ni 31, 2023 a 'Annual Report on Road Accidents in India, 2022' a tih chhuahah 2022 chhungin road accident tum 4,61,312 thlengah mi 4,43,366 te'n hliam tuarin mi 1,68,491 in nunna an chan thu sawiin, minute thum leh a chanve dan zelah lirthei chunga thihna a thlen thu leh, darkar tinah motor accident tum 53 thleng zeli mi 19 in nunna an chan thu a sawi a. Tlan chak lutuk chu accident thlen chhan lian ber 72% lai ni pha a nih thu sawiin, heng bakah fimkhur loh vanga lirthei chetsualna thleng thinte chu pumpelh tura tanlak a ngaih thu a sawi bawk.

Transport Minister chuan sawi chhunzawmin, sawrkar kum kal mek 2023-2024 hnuaia April-December, 2023 chhungin lirthei register thar 3,01,680 a awm thu tarlangin, thla 9 chhungin kum hmasa lirthei register khum a nih thu a sawi a. Kawngpui than chak aia lirthei nasa taka pung chuan khawpui tawt siamin kawng inchuhna a siam chhoh mek zel thu sawiin, hemi karah hian lirthei khalhtute chu hawihhawmna leh Dan te ngaipawimawh chunga lirthei khalh thin turin a chah a. Licence lak dawna Dan zawm tura chahte hre reng tur leh, hlauhawm taka lirthei khalh a bikin 'double overtake' chu ti lo tawp turin a chah a. Mipuite chu Road Safety Month hmang tangkai tur leh, Lirthei Dan leh hrai (Motor Vehicle Act & Rules) tha taka zawm mai chu himna a ni tih hre thar leh theuh turin a chah a. Road safety month hlawhtling taka hman a nih theih nan duhsakna a hlan a ni.

Thusawitu dang Transport Director Er. R. Lalrammawia chuan India ram chu khawvel pum huapa road safety dinhmun that lohna berte zinga mi a nih thu leh kum tin road accident avangin mi nuai 2 dawn an thih thin thu sawiin, khawvela lirthei awm zat za zela 1 (1%) chauh India ramah a awm laiin road accident avanga thi erawh zat za zela 11 (11%) lai a tling leh, lirthei chunga thihna avanga nunna hlu tak bakah sum leh pai tam tak sen ral a ni thin chu sawrkarin a ngaih pawimawh thu a sawi a. Lirthei chunga thi zinga tam berte chu thalai hnathawk rual an nih thu leh ram economy khawih thil a nih avangin sawrkarin a ngai thutak hle a ni, a ti a. Chak leh awmze nei zawka hmalak a nih theih nan National, State leh District Level-ah Road Safety Council din vek a nih thu a sawi bawk.

Vawiin Road Safety Month, 2024 hawnna hunah hian Pi Sangzikpuii, UDC, Transport Department chuan hunserh a hmang a. Pu Zothangzuala Chhangte, Joint Director (Hqrs)Transport Department kaihhruaiin Road Safety Month thutiam sawi rual a ni a. Pu C. Laltanpuia, Deputy Secretary, Transport Department & State Nodal Officer-in lawmthu sawiin hun hman a khar a ni.

Kumin hi Road Safety Month hman tum 2-na tur niin, a tum khat nan kum 2021 January thla khan hman a lo ni tawh a, hemi hma zawng hian Road Safety Week hman thin a ni. State Road Safety Council ruahman angin Road Safety Month, 2024 kaltlang hian February ni 12-17 chhung hian No Tolerance Drive kalpui a ni dawn a. Safety Month chhung hian lirthei fitness uluk lehzuala endik, Zirna in hrang hrangah Road Safety Pledge sawi rual, PWD kaltlanga lirthei accident hluarna lai chiang taka lantirna siam, Road safety awareness tam thei ang ber buatsaih, Media kaltlanga inzirtirna siam leh pawimawh dangte kalpui tum a ni.

He hunah hian Sr. SP Traffic Pu Stephen Lalrinawma leh sawm bik mi hrang hrangte an tel tha hle a ni.