3610/2023-2024

2024 Ramtuk thla ni 1: Vawiin khan Kolasib District Co-ordination Committee on National Deworming Day chu Kolasib Senior Chief Medical Officer Dr RK Lalthlamuana hovin a office chamber-ah an ṭhu khawm a. National Deworming Day (NDD) First Round 2024 kalpui dan tur an sawi ho.

Kolasib Sr CMO Dr RK Lalthlamuana chuan rulhut vangin pumna leh thihna hial te pawh a thlen theih avangin rulhut hlo ei chu a pawimawh hle a ni, a ti a. Rulhut vanga hrisel lohna chi hrang hrang ven nana rulhut hlo ineitir nan te, kut sil fai leh chaw ṭha pawimawhna inzirtir nan te NDD chu hman ṭhin a nih thu sawiin, NDD hlawhtlin nana theih tawpa thawhpuitu Education department leh ICDS te chungah lawm thu a sawi a ni.

National Deworming Day hi kum tin vawi hnih, February thla leh August thlaah te hman ṭhin a ni a. Kumin National Deworming Day First Round hi February ni 9 aṭanga hman ṭan tura ruahman a ni a. Naupang kum 1 aṭanga kum 19 inkarte chu rulhut hlo (Tab. Albendazole) eitir vek tur a ni a. Naupang kum 2 hnuai lamte chu mum chanvea eitir ṭhin niin, kum 2 chung lamte chu mum khat pek ṭhin an ni a. Rulhut hlo hi zirna in leh anganwadi centre-ah te pek leh tura ruahman niin, chumia hmaihte chu an ina kal chilha pek leh turin ruahman a ni.

Kumin NDD First Round-a rulhut hlo pek tur atan hian Kolasib District chhungah kum 1 leh kum 19 inkar target 29,931 an awm a. NDD First Round bul ṭanna leh hawnna hun hi February ni 9, 2024-ah District Hospital Kolasib OPD-ah hman tum a ni a. Hemi ni hian District chhunga school, college leh anganwadi centre-ah te rulhut hlo inpek a nih dawn bakah, sikul kal lote chu ASHA te'n an inah kal chilhin an pe ang a. Target zinga tel si, hemi nia pek hman lohte tan February ni 16-ah Mop Up buatsaih a ni leh dawn bawk a ni.

August 2023 round-ah khan Kolasib District chhunga target mi 33,249 aṭangin mi 32,557 chu rulhut hlo pek niin, hei hi 97.92% a ni a. Mizoram (93.1%) chu India ram pumah pakhatna a ni.