Vawiin khan Kolasib Diakkawn Hall-a Kut hnathawktute Ni- lawmna inkhawmah Transport Minister Pu PC Zoram Sangliana chuan District chhunga NLUP dawngtu tha pathum thlan chhuahte hnehah lawmman tangka fai leh Citation a hlan. Lawmman I-na dawngtu HZ Phira, Kolasib Vengthar, Fu china ei zawngtu chuan Rs 75,000 leh Citation a dawng a. II-na dawngtu Chawngphira, Bilkhawthlir N, Sangha Dil khuaha eizawngtu in Rs 50,000 leh Citation, III-na dawngtu Lalzawmmawia, Nisapui, Iskut huan siama ei zawngtuin Rs 30,000/- leh Citation a dawng bawk.

Thu sawiin Pu PC Zoram Sangliana chuan Sawrkar zara mi rethei tamtak khaichhuah an nita chu a lawmthu leh lungchhiat thlak zawk hiala a hriat thu a sawi a. Sawiselna tamtak karah NLUP hi kalpui a ni a. Land Use hmasa zawkah phei chuan mi nuihzat kan hlawh hial a ni, a ti a. Chuti chung chuan vawiin niah chuan bahlahna awm lovin in Vote hlu tak zarah kan kalpui zel a. Pawisa hi kan la sem zel dawn a ni, a ti. He NLUP hi retheite tan liau liau a niin Officer leh midang tuma eipui theih loh a ni, a ti bawk.

Kolasib Dist hi Mizoram tan potential area a ni tih hre rengin rinawm leh rim takin thawk ila Sekibuhchhuak tha ngai a ni tih i hre nawn ang u, a ti a ni.

Pu Hmingdailova Khiangte, Chairman Mizoram Youth Commission/MLA chuan thu sawiin kan mizo tlangvalte hnathawh kawngah kan thanharh a, tih tak zeta hna kan thawh a hun tawh a ni, tiin hei hi tlangvalte tan chona a ni, a ti a. Pu K. Lalrinthanga, Tuirial bialtu MLA pawhin thu sawiin Kut hnathawktute tuna sawrkar chuan a ngaihsak hle a, tunhma lama la tih ngai loh budget ah an puala sum dah a nita hial a ni, a ti a ni.

Pi Niharika Rai, IAS chuan inkhawm hi kaihruaiin inlawmna thu a sawi a. Pi Lallianpuii, DIPRO, Secretary, State Level Selection Committee chuan report a pe a. Pu Zairemmawia, Addl. DC chuan lawmthu sawiin inkhawm hi a tin a ni.