January ni 3-8, 2013 chhunga National School Games vawi 58-na New Delhi-a zawhfel takah khan Mizoram sorkar Education Department tirh te chuan rampum huapin Table Tennis leh Taekwondo-ah Championship an la a. Hemi pual lawmna hi vawiin khan Education Directorate Conference Hall-ah an Director Pu P.Lalchhuanga, IAS hovin neih a ni a, medal late chawimawina hlan an ni.

Khuallian Pu P.Lalchhuanga chuan Mizoram Education Department chu kawng hrang hranga mite sawisel a hlawh mek laiin kumthar bul an tanna chu thil lawmawm tak a ni, a ti a. Education Department chuan infiammite chawh phur leh an hmasawnna zel tur ngaihtuahpui chu a thil tum a nih thu sawiin tuna tang chuan rampum huap infiamnaa medal dawngtute hnenah sumfai lawmpuina, Gold-ah Rs.3000, Silver-ah Rs.2000 leh Bronze-ah Rs.1000 zel a pe tawh dawn a ni, a ti.

National School Games-a Mizo naupangte zuk chetdan tlangpui chu anmahni hruaitu Manager H.Sanglura, CPEO, Coach K.Rokima, CPEO leh K. Lalparmawii, Physical Instructor ten an sawi a. Table Tennis U-17 (Mipa) ah hian Mizoram Team an Champion a, player-te chu - Lalrinpuia, Lalhunhlua, Lalmalsawma leh B.Lalruatpuia te an ni a. Mimal-ah Lalrinpuia Champion a ni a, Lalhunhlua chu 3-na a ni. Hei hi National School Games Tabel Tennis-ah Mizoram Champion-na hmasa ber a ni. Taekwondo-ah hian U-17 (Hmeichhia) ah Lalruatkimi 3-na a ni a, U-17 (Mipa) ah Medalsanga hi 3-na bawk a ni. Taekwondo-ah hian Bronze pahnih an dawng bawk a ni.