“Kut hnathawktute Ni” chu vawiin chawhma dar 11 : 00 khan DC Office Complex Saiha-ah “District Level Organising Committee” te huaihawt in hlawhtling taka hman a ni.

He Ni hmanna-ah hian Pu H. Zothangliana, Parliamentary Secretary i/c PHE etc chuan Khuallian niin a hmanpui a, Pu RT Zachono, CEM, MADC chu Khual zahawm a ni. District Bawrhsap Pu Alok Swarup IAS chuan he Ni hmanna programme hi a kaihruaia, Rev Ch. Chhama, Sr. Executive Secretary, ECM chuan hunserh a hman hnu-ah Pu Zothanmawia Khiangte, SDC leh Secretary District Level Selection Committee nibawk chuan report tawi a pe a, Dr Chawngkhuma Chawngthu, President, AMFU Saiha District in thusawina a neih hnuah Khual zahawm Pu RT Zachono, CEM, MADC chuan thusawina neiin Kuthnathawktu te hi kan ram dinchhuah nana mi pawimawh berte an ni tiin Pathian hian mihring hi thawhrimna atanga ei hmu tur min siam kan ni , a ti bawk.

He Ni hmanna-a Khuallian Pu H. Zothangliana, Parliamentary Secretary i/c PHE etc Mizoram chuan thusawiin NLUP hi tanpuina a ni ngawt lova, chona a ni a ti a, kuthnathawktu kalkhawmte chu he NLUP chona hi rinawmna, taimakna leh chhelna nen huaisen taka hmachhawn ngam turin a chah a, Khuallian chuan NLUP hi hausak thur thur nan kan hmang lo pawh a ni thei mahse rinawmna leh taimakna nena kan thawh chuan retheihna khur atanga min khaichhuaktu tur atan chuan kan hman thei ngei ka beisei a ni, a ti. Mizoram khua 700 chuang awmna-ah NLUP thawktha khaw thlanna-ah Saiha District atanga Chakhang khua leh Lawngtlai District atanga Pangkhua te an tel chu lawmawm a tih thu a sawi lang bawk.

Khuallian chuan NLUP hmanga hnathawk thate hnenah Award semna a nei zui nghal a, he NLUP Award hi heng mite hian an dawng a ni- Pakhatna : N. Beiro S/o N.Chhoza, Lawngban khua Agriculture hnuaia WRC-I Trade thlangtu hnenah Rs 75,000/- leh Certificate, Pahnihna- K. Lalhmachhuana S/o K.Kapthanga, New Saiha West, Piggery Trade thlangtu hnenah Rs 50,000/- leh Certificate, Pathumna : S. Tlachai, S/o S. Zahnai, Zawngling khua Horticulture hnuaia Pineapple Trade thlangtu hnenah Rs 30,000/- leh Certificate hlan a ni bawk. He Ni hmanna ah hian NLUP Line Department hrang hrang te bakah Head of Department hrang hrang te an tel kim hle a, Chanchinbu mite leh Media lama thawkte pawh an tel kim hle a ni. Programme karlakah zaithiam tak tak zai te ngaihthlak niin Pu B. Lalchhawntluanga, SDO(S) Saiha chuan lawmthu sawina neiin he programme hi a titawp a ni.