Kolasib DC Pi Niharika Rai, IAS hovin vawiin khan Kolasib-a Republic Day hman dan tur DC Conference Hall-ah rel a ni.

Kumin Republic Day chu ropui leh phur taka lawm nise tiin committee chuan an rel a. Sawrkar hnathawk leh mipui mimir te kokim thei ang bera kal nise tiin hemi ni hi chuan Kohhran leh NGO zawng zawng te pawh programme duang lo turin committee chuan a ngen nghal a ni.

Republic Day lawmna hi chawhma dar 10:00 ah Tumpui field ah neih nise tiin an rel a. VIP in flag pawtpharha March Past chibai a chhanlet hnuah Tableau entir a ni ang a. Department paruk (6) DRDA, Minor Irrigation, Forest, Agriculture, Horticulture leh UD & PA ten an hnathawh tarlanna te an entir dawn a ni. Day lawmna atan hian Department hrang theuhte chanvo tur committee chuan a siam fel bawk.

Kum danga tih thin dan angin Home leh Chhawmdawlna in hrang hrangah thilpek hlan nise tiin committee chuan an rel bawk a. Hemi atan hian Department ten an phal ang tawk tawk an thawh ang a, chu chu MJA ten an khawn dawn a ni.

Vawiin a committee ah hian Pu Madhur Verma, IPS, SP leh Department hrang theuh hotute an tel kim hle a ni.