Vawiin chawhma dar 10:00 khan Tumpui Field, Kolasib ah India Republic Day champha vawi 68-na chu India ram hmundang ang bawkin urhsun taka hman a ni a. Pu H.Lalengmawia, Kolasib Bawrhsap chuan hnampuan zar pawtpharhin, hnam puanzar zahna lantirtu Parade Contingents 19 te chibai bukna a chhang let a ni.

Pu H.Lalengmawia chuan mipui kalkhawm te chu Republic Day chibai bukin, Kolasib District-in hmasawnna hmel duhawm tak tak a hmuh chu district mipuiten sawrkar ruahmanna leh a thawktu te an tawiawm that vang anih thu leh lawmawm a tih thu a sawi a. District chhunga sorkar hmalakna hrang hrang a tarlang a, Bairabi to Sairang Rel kawng siam mek chu zawh hun tur ruahman chhunga zawh a nih ngei theih nan chak taka hmalak mek zel a ni a. Tuirial Hydel Project 60MW pawh kum laihawla commission hman tura hnathawh mek niin, tui pawh 52meters a sang tlin tawh a ni. Tui thianghlim hnianghnar taka kan hmuh theih nan PHE Department chuan hma la zelin, Bilkhawthlir Water Supply Scheme chu 9th December, 2016 khan hawn a ni.

Zirna in hma a sawn a, ziak leh chhiar thiamlo te thiamtir an nih theih nan Education Campaign neih thin a ni a. Education Department, DC Office, DRDA te leh khawtlang hruaitu tanghoin theihtawpa hma la in, hun reilote chhungin khaw 23 chu ziak leh chhiar thiam vek awmna a puan theih a ni a. Kolasib Officers’ Club buatsaihin Education Campaign hi neih thin a ni bawk a. Primary Teachers te Assam leh Meghalaya-ah District Administration hmalakna in an zirna kalpui dan enturin tirhchhuah an ni bawk.

Sorkar flagship programme New Land Use Policy (NLUP) pawh a hlawhtlin ngei theih nan line department hrang hrang ten theihtawp chhuahin hma an la mek zel a, tunah hian 3rd leh 4th Phase sem chhoh zel a ni. Animal Husbandry & Veterinary hnuaia NLUP hmalakna avangin Kolasib chu vawkah a intodelh mai nilovin, kar tin vawk puitling 20-30 district dangah hralhchhuah thin a ni a. Oil Palm district tiha hriat khawpin Kolasib district-in Oil Palm a tharchhuak hnem a, 6788Ha. a zauah chin mek niin, April-December, 2016 chhung khan 1769MT hralhchhuah a ni a. Kawnpui leh Bukpui-ah Godown 2500qtls ve ve lenna chu sak niin, tangkai taka hman a ni tawh a ni.

Mizoram puma Hospital fai inelna Kayakalp 2016 ah Kolasib District Hospital chu pathumna niin, Community Health Center fai inelna-ah Vairengte CHC chu pakhatna a ni. District Hospital ah hian April-December, 2016 khan RSBY mi 873 in an hmang tawh a ni.

Dan leh thupek kenkawhna lamah Police Department chuan hma an la zel a, krismas leh kumthar vuakvetah boruak muanawm a awm theih nan leh lirthei chetsualna liantham a awm lohnan ngawrh takin hma an la a. Police a thubuai ziahluh te an bawhzui that avangin 100% conviction rate an nei a ni. Thubuai chak zawkin leh Aizawl a Court sang zawk pan kher ngailova Kolasib a ngaihtuah ve theihna tur Fast Track Court chu November 2, 2016 khan hawn a ni a. Kum kalta chhunga Sawrkar sumbawmah Taxation Department in Rs. 11,08,76,225/- chhiah a chhung a, Excise and Narcotics Department in Rs. 4,16,68,742/-, a chhung thung.

Pu H.Lalengmawia chuan he ni hmang tura kalkhawm zawng zawng te leh he ni hmanna a hlawhtlin theih nana chanvo nei zawng zawng te chungah lawmthu a sawi a. Sorkar hmalakna thlawp a, sorkar-ah beiseina leh rinna nghat zel turin a sawm a. Inpumkhatna leh inunauna vawng nung zel tur a chahin, India ram leh Mizoramin hma a sawn a, kan tu leh fate luah tur ram nuam leh chhenfakawm kan hnutchhiah theihnan a inhlan thar theuh turin a sawm bawk.

Vawiina Republic Day Ceremonial Parade ah hian Contingent 19; armed contingent 1, Ex-service contingent tiamin uniformed contingent 6, School Contingent 11 leh pipe band 1; an awm a ni. Ceremonial Parade-a Uniformed Contingent zingah

1) Scouts & Guides, St.John’s Higher Secondary School, Kolasib an ni a,

2) NCC Girls, St.John’s Higher Secondary School, Kolasib an ni a,

3) Excise & Narcotics Department, Kolasib an ni a.

School Contingent zingah -

1) Jawahar Novadaya Vidyalaya, Thingdawl an ni a,

2) DIET, Kolasib an ni a,

3) Rengtekawn High School an ni.

Lawmna inkhawm neih zawh hian sawm bikte pualin chhun dar 12-ah thingpui ruai Circuit House-ah neih a ni.

District chhunga hmundangah pawh Republic Day lawmna inkhawm hi neih niin, Vairengte-ah Dr.Arun T, SDO(C) in hnam puanzar pawtpharhin parade contingent te hnam puanzar chibai buk a chhang let a, Vairengte Field ah hman niin, parade contingent 13 an awm a ni.

Kawnpuiah Pi Melody Ngurthantluangi, BDO Thingdawl chu khuallian niin hnam puanzar a pawtpharh a. Kawnpui ah hian Hockey Ground-ah lawmna inkhawm hi hman niin, parade contingent 8 ten hnam puanzar chibai an buk a ni.

Bilkhawthlir-ah Pi C. Lalduhzuali, BDO Bilkhawthlir chuan hnam puanzar pawtpharhin, he ni lawmna inkhawm hi Community Hall-ah hman a ni.