Vawiin khan Thuamluaia Mualah India Republic Day vawi 68-na chu ropui taka lawm a ni a. Lunglei DC Pu K. Lalrohlua chu Khuallian a ni a, dar 10:00-a hnam puanzar a pawh pharh hnuin parade contingent 20-te hnam puanzar chibai bukna a changlet a ni.

Pu K. Lalrohlua chuan mipuite chu Republic Day chibai a buk a, India khua leh tuite tana zalenna sual chhuak tute kan hre reng in, zahna chibai kan buk a ni, a ti a. India ram Dan bu (Constitution) siam leh hman tanna ni champha ah hian a ropuina leh hlutna hre thar leh theuh turin a chah a ni. India Dan bu kaihhruaina hnuaia mitin te dikna leh chanvo humhalh sak a ni chu lawmawm a tih rualin, kalkhawmte chu kan ram Dan bu ropuina leh zahawmna vawnghim turin kan tih tur (Fundamental Duties) erawh kan hlenchhuah ve a tul a ni, a ti. Hmasawnna tluantling leh thangtharte hnutchhiahtlak a awm theih nan, sawrkar hnathawk kalkhawm zawng zawng te chu mahni hna theuha inpe thar turin a ngen a. Sawrkar hmalaknate ti hlawhtling turin mipuite theihtawp chhuaha sawrkar tawiawm turin a sawm bawk a ni.

Khuallian chuan Lunglei District chhunga department hrang hrang te hmalakna a tarlang a. NLUP hnuaiah Line Department-ten beneficiary-te tanpuina an sem tawh zat leh an sem zel turte a tarlang a. Lunglei District Police chuan dan leh hrai ken kawhna lamah theihtawp chhuah in, training leh awareness programme te a buatsaih a, Late night patrolling leh Mobile checking zan tin dar 8 atangin zing dar 1 nei thin in, PWD Building Division, Lunglei hnuaiah Police Station pali (4) sak a ni a, chung zinga pakhat (1) chu Grade 3 Police Station a ni. P & E Department-in Kawmzawlah 33kV Sub-Station an bun fel a, Restructured Accelerated Power Development Reforms Programme kaltlangin Electronic Computerized Billing hman a ni. PHE Department, Lunglei WATSAN Circle hnuaiah Rural Water Supply Scheme panga (5) kalpui mek niin, scheme pali (4) zawh fel tawh a ni a, Computerised Water Billing System kalpui tum mek a ni. Greater Lunglei Water Supply Scheme Phase II pawh buaipui mek a ni.

Taxation department, Lunglei Zone chuan revenue cheng 9,30,60,000 a lalut tawh a, Excise & Narcotics pawhin revenue cheng 6,78,20,766 lalut in, Printing & Stationery pawhin revenue cheng 9,68,365 a hmu tawh a ni. Commerce & Industries pawhin cheng 20,00,000 a hlawh chhuak tawh bawk a ni. District Hospital-ah Haemodialysis khawl thar pahnih (2), R.O. plant leh 300 mA X-Ray khawl bun a nih thu a sawi a, Public Health Center panga (5) sak mek niin, Urban Public Health Center (UPHC) pakhat (1) sak zawh a ni tawh a, Sub Center Pathum (3) sak belh leh mek a ni. District Urban Development Office hnuaiah Housing For All, Swachh Bharat Mission leh National Urban Livelihood Mission(NULM) te kalpui mek a ni a. Lunglei khawpui chu pawna inthiar awm tawh lohnaa (Open Defecation Free) puan niin, Serkawn-a Lena Sport Stadium pawh kumina hawn hman beisei a nih thu a sawi a ni.

Food Civil Supply & Consumer Affairs hnuaiah Food Security Act chu tluang taka kalpui a ni a, Ration Card 43274 pe chhuak in beneficiary 204390 an awm a ni. SSA Mission hnuaiah zirlai naupangte hnenah uniform a thlawn a pek a ni a, pawl 1 atanga pawl 8 zirlai naupang 20572-te hnenah a thlawn in zirlaibu sem chhuah a ni. Swachh Bharat Swachh Vidyalaya hmangin Boys & Girls Toilet school 121-ah te sak a ni tawh bawk a ni. Labour, Employment & Industrial Training hnuaiah mi 112 chu ITI, Lungleiah an training mek a ni. Social Welfare Department hnuaiah scheme hrang hrang kalpui a ni a, National Old Age Pension Scheme-ah hian beneficiaries 5268 an awm a, Lunglei ICDS Project hnuaiah khua 60 enkawl niin Anganwadi Centers 143 a awm bawk a ni.

Ceremonial Parade hi Parade Commander S.I. B. Lalnunsanga leh 2nd Parade Commander S.I. R. Lallungmuana ten an kaihruai a. Parade Contingent -Armed 2, Unarmed 4, School Contingent 12 leh Pipe Band 2 an tel a ni. Ceremonial Parade-a tithe zualte hnenah lawman sem a ni a. Republic Day lawmna pual hian Lunglei District Sports Committee (LDSC) chuan discipline 3 – Chess, Tennis, Pool leh Snooker ah tournament a buatsaih a. Heng inelnaa chak te hnenah lawman sem nghal a ni. 1st Assam Rifles-ten Dog Show an nei bawk a ni.

Chawhnu dar 1:00-ah DC Bungalow-ah sawm bikte tan thingpui ruai buatsaih a ni bawk.