India Republic Day vawi 68-na vawiin khan Aizawl AR Lammual-ah ropui takin hman a ni a. Republic Day lawmnaah zing dar 9:00-ah khan Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chuan Hnam Puanzar a pawtpharh a, Republic Day Ceremonial Parade contingents te a endik hnuah Hnam Puanzar chibai rawn buk Parade contingents-te chhang letin Republic Day puala thuchah a sawi.

Mizoram Governor chuan Mizoram mipuite Republic Day leh Kumthar chibai bukin duhsakna a hlan a. India ram mipuite duhthusam mahni inrorel thei, mipuite tana thawk, hnam leh sakhuanaa inthliarna awm lohna leh mipuite kuta thuneihna ram neih theihna tura India Danpui lo duang chhuaktu ram hruaitu hmasate zahna entirin i hre reng ang u tiin mipuite a chah. Ram hmasawnna atana pawimawh hmasa - remna leh muanna - Mizoramin a nei hi a lawmawm takzet a, hetiang dinhmun awm theihna tura dan leh thupek kengkawhtute, tlawmngai pawl, kohhran, media leh mipuitete hnathawh a fak bawk.

Republic Day puala a thusawinaah Larsap chuan Mizoram sorkar hmalakna langsar zual engemawzat a tarlang a. Eizawnna kawnga khawsak harsa zualte chawikanna, sorkar hmalakna lian ber NLUP chu hlawhtling taka kalpui mek chu hmawr bawk tep a ni a, hemi hnuah hian New Economic Development Policy (NEDP) hmangin nasa taka hnathawh tan leh a ni tan tawh tih a sawi. Mizoram mipui zaa 70% te chu agriculture leh a kaihhnawih hmanga eizawng an nih avangin sorkar pawhin ngaih pawimawh hmasak berah a nei a,. Kawng leh kawlphetha bakah tui in tur thianghlim semchhuahna tur hmun siam belh zelna kawngah sorkarin hmalakna nasa tak a nei mek a. Damlo enkawlna hmun leh hmanrua neih belh bakah mihring hriselna tha zawka enkawl hi sorkar ngaih pawimawh berte zingah a tel thu a sawi. Zirna siam tha turin sorkar chuan sum leh pai leh hmanrua a neih ang apiang tangkai zawka hman dan tur a ngaihtuah zel a; Aizawl-ah Education Centre, Serchhip-ah Education Complex bakah school building engemawzat chu sak leh thawmthat an ni mek a ti bawk. State sorkar hmalakna piah lamah sorkar laipui scheme leh programme hrang hrangte chu tluang tak leh chak takin state mipuite tan kenkawh reng an ni a, thingtlang leh khawpuia mihring khawsak phung chawikan tumin sorkar chuan theihtawp a chhuah reng a ni, a ti.

Mizoram Larsap chuan thu a sawi zelnaah sorkar chuan infiamna khawvelah thalaite chher puiltin hnathawk chhunzawm zelin khelmual tha leh infiamna hmun tam tak a siam belh mek thu a tarlang a. Tunah phei chuan India hmarchhak bialah Mizoram hian infiamna hmunhma leh khelmual nei tha ber anga sawi hial thei a ni, a ti. Mizoram Youth Commission kaltlangin Mizo thalai 3000 chuangin skill training nei tawhin, an zinga tam zawk chuan state chhung leh pawnah hnathawkin an awm mek a ni, a ti a. Autonomous District Council 3-te hman tur sum pek dan pawh ennawn niin kumin atang chuan 1st Mizoram Financae Commission rawtna zulzuiia kalpui tum a nih thu leh hei hian ADC 3 huamchhungah hmasawnna chak zawk a thlen ngei a beisei thu a sawi bawk. Heng bakah Mizoram sorkar chuan Cooperative movement leh Information technology hmasawnna turte, pianphunga rualbanlo leh kum upa zawkte hamthatna turte, mipuiin rualkhai zawka buhfai an chan tlan theih nan leh Goods & Services Tax hmanga dik leh felfai zawka chhiah lak chungchangah sorkar chuan chak takin hma a la mek a ni tih a sawi bawk.

Lammual-a Republic Day 2017 lawmnaah hian Chief Minister Pu Lal Thanhawla leh Speaker Pu Hiphei bakah Minister, Parliamentary Secretary, MLA, official, zirlaite leh mipui thahnem tak an tel a. Parade contingent titha te leh he Ni puala infiamna chi hrang hranga lawmman dawngtute hnenah Governor chuan lawmman a sem bawk a ni. Lammual-a lawmna inkhawm zawhah hian Circular Lawn, Raj Bhavan-ah sawm bikte tan Governor chuan thingpui ruai a lo buatsaih a, he hunah hian Republic Day 2017 puala ‘Governor’s Republic Day Painting Competition’-a tithate hnenah lawmman sem nghal a ni