Vawiin khan Road Safety Week vawi 27-na kharna hun chu Diakkawn YMA Hall, Kolasib ah buatsaih a ni a. He programme hi Kolasib Addl DC Pu R. Lalremsanga chuan kaihruaiin Kolasib SP Pu C. Lalzahngoa leh Pu Vanlalmawia, Principal DIET Kolasib ten khuallin leh khualzahawm niin he hun hi an hmanpui a ni.
Kolasib SP Pu C. Lalzahngoa chuan lirthei khalhtute hriattur pawimawh tak tak te tarlangin State pawn atanga rawn kal hnamdang ten Signal light chu Passing light emaw tiin, an hman thin avangin Mizo te pawhin Signal light hman dan dik lovin hmang kan awm zeuh zeuh thu a sawi a. Tunhnai-ah Kolasib Police ten Vairengte Police checkgate-ah Signal light pek dan inzirtirna thuziak phai lam atanga lirthei rawn kal te hnenah an sem thu a sawi a. Auto Rickshaw drivers zingah midang ngaihchanna hre miah lova kawngpui lai-a in her pawp ching an awm chu sim tha a tih thu te, tul lova Horn hmeh rik vak vak ching an awm thin chu thalo a tih thu te, Ni a tlak atanga darkar chanve chhungin headlight chhin ngei ngei tur anih thu te a sawi lang bawk a. Lirthei khalh laia Mobile Phone hman chu dankalh anih thu Kolasib SP chuan a sawiin,tunhnai-ah Supreme Court in thupek a tihchhuah angin lirthei khalh laia Mobile Phone hmang kan man te chu thla 3 chhung an Driving licence kan cancel sak tawh ang a ti a. 2 wheeler leh commercial vehicles khalh laia Meizial zu te chu dan in a khap tlat thu a sawi bawk a ni.
Thusawitu dang Pu Vanlalmawia, Principal DIET, Kolasib chuan driver te pawimawhna sawi langin chu Commercial Vehicles khalhtu te chu khualkhua atanga rawn kal te lo hmachhawn hmasa ber tu an nih avangin Kolasib District hmel lanna an nih thu leh hemi avang hian an nun uluk turin heng motor khalhtu te chu a chah a. Nu leh Pate chu an fate kum tlin hma-a lirthei khalh zirtir lo turin a chah bawk a ni.
Road Safety Week kharna Inkhawm-ah hian lirthei khalhtu te hnenah Award hlan an ni a, Best Auto Rickshaw Drivers atan Pu Vanlalsawmachu thlan a ni a, Best Taxi Drivers atan Pu Lalfakzuala chu thlan niin, Best Maxi Cab Drivers atan Pu C. Lalsawma chu thlan a ni bawk. Award dawngtute hnenah hian khuallian chuan chawimawina thuziak a hlan a ni.
Road Safety Week kharna Inkhawm-ah chawhma lamah thupui thlan bik hmangin Drivers te hnenah zirtirna pek an ni a, kharna inkhawm-ah hian Maria CT Zuali Director SIRD bakah Kolasib District chhunga Head of Department hrang hrang te an tel bawk a ni.
