Vawiin khan AMFU District Headquarters ten ran khuahkhirh leh rukruk chungchangah loneituten harsatna an tawhte sutkian nan lehkha an thehluh bawhzui nan DC Pu H. Lalengmawia, IAS hovin he thilah hian a Office Chamber ah meeting neih a ni.

Meeting ah hian DC chuan heng chungchangah hian loneitu te hi V/C leh khawtlang hruaitu te nen an tan tlan a, an thawho ho a ngai a, huan te chu hmun hla tak tak anih avangin Police ten an tuam zo vek seng lova chuvangin mipui pawhin hemi chungchang hi thuneitu te rang taka an hrilh leh hriattir a pawimawh a ni, a ti. Hemi chungchangah ah hian thupek chhuah anih tur thu leh V/C kaltlanga tlangau dan ruahman anih tur thu te DC hian a sawi a. District Level Agricultural Exhibition neih chungchang pawh sawiho niin kum thar lamah he thil hi buatsaih anih theih nan DC chuan hmalak a tum thu a sawi bawk.

Meeting ah hian Addl. DC Pu R. Lalremsanga, Add. SP Pu SK Hmar, SDO(Sadar) Pi K. Vanlalruati bakah Horticulture, Fisheries, AH & Vety-a District hotulu leh Agriculture Department aiawh leh AMFU District Headquarters hruaitu te an tel a ni.