3939/2023-2024

2024 Ramtuk thla ni 23: National Centre for Management of Agricultural Extension (MANAGE), Hyderabad leh State Agricultural Management & Extension Training Institute (SAMETI), Mizoram aṭanga sponsored training programme fund an hmuh hmangin Krishi Vigyan Kendra (KVK), Kolasib chuan February ni 19 - 23, 2024 chhung khan ṭhalaite hnena sangha khawi dan zirtirna, "Skill Training of Rural Youth (STRY) on Fish Rearing and Management” an buatsaih.

Training hi KVK Training Hall, Kolasib-ah buatsaih niin, Government Kolasib College zirlai mi 25 hnenah zirtirna pek a ni a. Training zawh ni hian zirlaite chu Certificate hlan an ni.

Kolasib District Fisheries Development Officer (DFDO) Pi C. Lallianpuii chuan hun hmanpuiin, sangha khawi (fish farming) chu eizawnna ṭha tak a nihzia leh Kolasib District phei chu sangha dil siam nan duhthusama hmun rem a nih thu te a sawi a. Zirlai kal khawmte chuan an thil zirte a taka an hman ṭangkai ngei a beisei thu a sawi.

Training hi KVK Kolasib Senior Scientist and Head Dr Michelle C. Lallawmkimi chuan kaihruaiin, Subject Matter Specialist (Fishery Science) Pu PC Rualthantluanga chuan zirtirna a pe a. Training-ah hian sangha dil siam dan te, sangha khawi leh enkawl zui dan hrang hrangte a thu (theory class)-a zir ho a nih bakah, a taka enchhinna (practical class) neih a ni bawk a. Ennawm atana sangha khawina (aquarium) siam dan te pawh zir ho a ni bawk.