2300/2026-2027

Kolasib, 22nd September, 2026: Vawiin chawhnu dar 1:00 khan District Disaster management authority huaihawtin Govt. CZ Higher Secondary School, Kolasib te nen Diakkawn YMA Hall-ah 'Implementation of School Safety Programme' hnuaiah chhiatrupna thleng thei laka inven leh inbuatsaih dan training neih a ni.

He hawnna inkhawm hi Pu Lalnunfela, District Organiser chuan a kaihruai a. He hun hmanpuitu Kolasib Bawrhsap, Pu H. Dolianbuaia chuan thu sawiin, India ram chuan mumal takin Disaster Management Plan a neih thu a sawi a. "Disaster (chhiatrupna) hian huam a ngah hle a, khuarel chhiatna leh mihringte siamchawp chhiatna a awm a ni," a ti. Sorkarin chhiatrupna laka inven leh lo inbuatsaih lawk chu a ngai pawimawh em em a, chuvang chuan hetiang training leh program te hi a buatsaih thin a ni, a ti bawk.

Bawrhsap chuan, "Kan district chhungah pawh kan hriat miah lohin chhiatna a thleng nasa thin a, a phenah mipuite him nan theihtawp chhuahin hna thawh thin a ni," a ti a. Chhiatrupna laka him turin mipuite leh zirlaiten training an mamawh hle tih sawiin, chhiatrupna a thlen thulha hmalak dan tur vawiina training pekte chu uluk taka ngaithla turin kalkhawmte a chah a ni.

Hawnna hun hman zawh hian Session hnihah thenin training hi neih chhunzawm a ni a. Session hmasa zawkah Pu John Lalmuankima Ralte, Faculty ETC, SIRD&PR, Kolasib chuan 'School Safety and Preparation of School Disaster Management Plan' tih thupui hmangin zirtirna a pe a. Session hnuhnung zawkah Quick Response Team (QRT) member pahnih, Pu Paul Lalramliana leh Pu Lalthansanga ten 'Basic Search and Rescue' (Chhanchhuah hna thawh dan bulthut) chungchangah zirtirna an pe bawk a ni.

He School Safety Programme hnuaia training hi naktuk September ni 23, 2026 khian Govt. Diakkawn High School, Kolasib pualin neih chhunzawm leh a ni ang.