3252/2023-2024

2024 Pawlkut thla ni 6: Special summary revision, 2024 atana hman tur Kolasib District-a assembly bial pathuma draft electoral roll chu vawiin khan Kolasib District Additional Deputy Commissioner Pi Melody Ngurthantluangi chuan Kolasib DC Conference Hall-ah a tlangzarh a. Draft electoral roll hi political party ai awhte hnenah a hlan nghal.

Pi Melody Ngurthantluangi chuan Kolasib District chhunga India khua leh tui kum 18 tling tawh phawtte chu electoral roll-a inziah luh theih a nih thu sawiin, kum 18 tling tharte electoral roll-a an inziah luh zel theih nana mi dang hrilh hriat kawnga ṭhahnem ngai turin kal khawmte chu a chah a. A hun taka draft roll tlangzarh a nih theih nana buaipuitu election branch chungah lawm thu a sawi bawk.

Election Officer Pi Christina Lalmuanzuali chuan report pein, tuna special summary revision neih turah hian final electoral roll tlangzarh a nih hnuah MP Inthlanpuia hman zui beisei a nih avangin roll-a inziah luh, hming paih, hming thlak leh insawn duhte tana hun hawn chu chhawr ṭangkai a pawimawh thu a sawi.

Draft electoral roll tlangzarh tak aṭanga a lan danin, 4-Tuirial (ST) Assembly Constituency (A/C)-ah vote nei mipa 8,990 leh hmeichhia 9,375, an vaiin mi 18,365 an awm a; 5-Kolasib (ST) A/C bialah vote nei mipa 11,296 leh hmeichhia 12,674, an vaiin mi 23,970 an awm a; 6-Serlui (ST) A/C bialah voter mipa 10,308 leh hmeichhia 10,812, an vaiin mi 21,120 an awm a; assembly bial pathumah hian vote nei mipa 30,594 leh hmeichhia 32,861, an vaiin mi 63,455 an awm a ni.

Vawiinah hian service voter roll pawh tlangzarh nghal niin, 4-Tuirial aṭanga sipaia ṭang service voter 132 an awm a. 5-Kolasib-ah service voter 126 awmin, 6-Serlui-ah service voter 145 an awm bawk a. Kolasib District pum puiah service voter 403 an awm a ni.

Tun ṭuma special summary revision neih turah hian India khua leh tui kum 18 tling chin, January ni 1, 2006 leh a hma lama piang electoral roll-a inziah luh thar, paih, insawn leh siam ṭhat duhte tan January ni 22, 2024 thleng hun hawn a ni a. February ni 8, 2024-ah final electoral roll chu tar chhuah tura ruahman a ni.