4470/2025-2026

Kolasib, 13th February, 2026 : Nimin chawhnu dar 1:00 khan DC Conference Hall, Kolasib-ah Mizoram State Day vawi 40-na puala State Day of Prayer hman dan tur relin thutkhawm a ni a. He hun hi Pu H. Lalramliana, Sub-Divisional Officer (Sadar), Kolasib District chuan a kaihruai a ni.

Meeting kaihruaitu Pu H. Lalramliana chuan State Day of Prayer 2026 hman dan tur ngaihtuah tura he thutkhawm hi koh a nih thu kalkhawmte a hriattir a. State Day of Prayer hi Mizoramah kum 2024 atang khan hman tan niin, kuminah pawh tluang leh hlawk taka hman a nih theih a beisei thu a sawi bawk.

Vawiina thutkhawmna chuan State Day of Prayer, 2026 chu Kolasib-ah pawh hman ngei nise a ti a. A hmun atan Deputy Commissioner Pisa kawt ruat niin, zingkar dar 7:30-ah tan tura ruahmanna siam a ni. He hunah hian Pu Robert C. Lalhmangaiha, District Bawrhsap chu Chairman atana ruat a ni a. Pastor Laldintluanga, Chairman, Kolasib Kohhran Hruaitu Committee (KKHC) leh Pastor, Hmarveng Bial chu sawihawnna leh tawngtai thupui sawitu tura ruat niin, Captain Lalchhanchhuaha, Sr. Vice Chairman, KKHC leh C.O., Diakkawn Corps chu malsawm tawngtaina hun hmangtu turin ruat a ni bawk.

Committee chuan he hunah hian mipui a tam thei ang ber sawm nise a ti a, hemi kawnga hma la tur hian Kolasib Kohhran Hruaitu Committee chu beisei an ni. Vawiin thutkhawmah hian Sorkar official-te leh Kolasib Kohhran Hruaitu Committee hruaitute an tel a ni.