4471/2025-2026

Aizawl, 14th February, 2026 : Nizan khan Higher & Technical Education minister Dr. Vanlalthlana chuan MS Academy, Aizawl hnuaia zirlai MPSC Combined Exam, 2025-a hlawhtlinna chang mi 14 te lawmpuina hun chu khuallian niin a hmanpui.

He hunah hian khuallian Dr. Vanlalthlana chuan thu sawiin, hlawhtlinna changtute hnenah ram dang atanga IAS Mizoram a posting neite kawm ngeih tur leh thawhhona tha neih pui turin a chah a, an let leh thleng a mi tangkai thei an nih avangin a pawimawh thu a sawi. Sorkar hnathawk ni satliah lo a, sorkar fawng vuantute hnenah rawtna an neih ang te meeting-na pawh a sawi chhuak ngam ve tur leh uluk taka an lo ngaihthlak tur thu a sawi. Minister chuan- thawkrim leh thiam ngah te chu duhsak pawh an hlawh lo thei lo a, chutih laiin mahni invawng zahawm turin hlawhtlinna chang thar te chu a chah. Khawtlang leh Kohhran atangin sum khawn pawh lo awm se mahni income dik tak mila pek mai a that thu a sawi. Sorkar hnathawk tir tan a rang lam a sum peipun lam (Investment) ngaihsak nghal turin a chah bawk a, chhungte tan zan khat mitchhin tawh pawhin mangang a an awm loh nan a that thu a sawi a. Zoramin bung thar kan kai chho mek a, sorkar fawng vuantute hian thil kan hre famkim vek lo a, hmasawnna hi official ram hmangaihtu tak tak te vang a ni a ti. Kan thawhho thiam a ngai a, kan hlawhtlin tirh a Pathian hming kan lam zin ang hian kan hnathawhna dawhkanah Pathian kan mamawhna a la in tan dawn chauh tiin a sawi.

Khualzahawm MYC Chairman, Pu Malsawmzuala Ralte chuan vanram kaina dal tu chu hlawk viau dawnin lang mahse chatuan nun a tan a hlawk dawn loh avanga hnawl ngam turin a chah a. Sorkar hna hian mawhphurhna lian pui a keng tel a, he hna in thawhna chhan tur ber chu mipuite rawngbawl a ni. Chuvangin tumah kan rawngbawlsak a te biak hreawm in kan awm tur a ni lo a ti a, Khawi block-ah emaw BDO niin, a then chu DC office-ah. Staff te leh sumah pawh thuneihna sang tak in nei ngei dawn. Dikna leh midangte chunga that chhuah hi vawn reng tur a ni. Tling tura theihtawp in chhuah ang chiah khan, officer tha leh rintlak ni turin theihtawp in chhuah zui zel dawn nia. A tul huna rang taka decision siam te, sorkar kalphung pela chunglam atanga nawrna te pawh in la tawng ang. Dikna tungding tura huaisen tlat turin ka fuih che u a ni a ti.

MPSC Combined Exam-a hlawhtling mi 14 te pual hian  Mama’s Heaven Vaivakawnah hun hman a ni a. He hun hi hlawhtlinna chang leh an chhungte bakah sawm bik te’n an hmang a ni.