Vawiin khan Tuirial bialtu MLA Pu Hmingdailova Khiangte chuan Thingdawl VC House (BNRGSK Hall) ah Swachh Survekshan - Grameen 2018 hawnna a nei.

Thingdawl BDO Pu Gaston Vanlalhriatpuia kaihhruai inkhawm tawiah hian khuallian Pu Hmingdailova Khiangte chuan faina chungchang chu Mizoram in a ngaihsak hma a, faina hapta pawh kum rei tawh tak atang khan kan hmang tawh a ni a ti a, a bial chhunga VC hrang hrangten faina kawnga inelna pawh an lo nei tawh thin tih a sawi. Pu Hmingdailova Khiangte chuan India hnampa Mahatma Gandhi khan India mipuite chu faina lamah hma an sawn theihna turin a zirtir nasat thin thu pawh a sawi a, "Independence aiin faina hi kan tan a pawimawh hmasa zawk tiin a sawi hial a ni," a ti.

Lehkha thiamte chuan faina an ngaina tih bialtu MLA chuan a sawi bawk a, mahse Mizo zingah lehkha thiam kan tam tawh ngaihtuahin hmasawnna tur kan la ngah hle tih a sawi. "Kan luidung zawng zawngah polythene a khat tawh a, hengte hi kan ngaimawh a hun tak zet a ni," a ti bawk.

Report-ah tarlan a nih danin Swachh Survekshan -Grameen kaltlang hian India rampum huapin khawtinte faina kawngah inelna neih mek a ni a, sorkar laipui atanga palai lokal te chuan August 1-30 inkar chhung hian Mizoram khaw hrang hrang an rawn endik ang. Khawchhung faina mai bakah mipui punkhawmna Anganwadi te, school te, damdawiin te an en dawn a, hengah hian inthiarna leh tui thianghlim an ngai pawimawh dawn tih tarlan a ni bawk. Hei bakah hian mipuiten SSG an hriatna tilang tur leh mipuiten he hmalakna hi an chhawr tangkai a ni tih sorkar laipui an hrilh theihnan Mobile application siam a nih thu tarlan a ni.