Vawiin chawhnu khan Chief Minister Pu Lal Thanhawla’n Armed Veng Community Centre sak thar a hawng. Hawnna inkhawm, UD&PA Minister Pu Zodintluanga kaihhruaiah hian Home Minister Pu R.Lalzirliana leh Finance Minister Pu Lalsawta te chu khual zahawm niin Cooperation Minister Pi Vanlalawmpuii Chawngthu, Mizoram Legislative Assembly Deputy Speaker Pu R.Lalrinawma, MLA Pu Lalrobiaka leh AMC Mayor Pu PC Lalhmingthanga te pawh an tel a ni.

Chief Minister chuan thalaite khawvel thar din turin sawrkarin infiamna lamah te, zirna lamah te, eizawnna siamsak kawngah leh thil dang tam takah tan a la a, sports lamah thalaite tuihalna phuhru turin hmasawnna ruhrel tam tak a din belh a, thalaite pawhin hman tangkai nachang hriain tunah chuan India ram chauh ni lo khawvel kan al ve tawh a, kan infiammiten khawvelah min pholang a ni, a ti. Central Service leh sipai officer-a Mizo tam tak  kan neih thin tuna kan tlakhniam tak veiin sawrkar chuan MYC kaltlangin coaching a kalpui a, sipai sikul tha - Sainik School te dinin tunah hian Mizorama Sainik School hi India rama hmeichhe admit thei hmasa ber a ni, a ti a. Sawrkarin heng ruahmanna a siamsak zawng zawng hmang tangkai tur hian thalaite an pawimawh a, nu leh pate pawhin an tu leh fate an fuih a tul hle, Pu Lal Thanhawla chuan a ti. Mizoram sumpai dinhmun siamtha tura sawrkar hmalakna in rah tha a chhuah a, mimal sum thawhchhuah pawh a pung a, Armed Vengin Hall tha leh changtlung tak a neih tak pawh hi heng zawng zawng rah chhuah hi a ni,  a ti a.  Armed Veng mipuite chu Community Centre an neih thar tak uluk leh fai taka enkawl chhunzawm tura chahin thalaite leh a mamawh apiangin tangkai taka an hman a beisei thu Chief Minister Pu Lal Thanhawla chuan a sawi a ni. 

Home Minister Pu R.Lalzirliana chuan Mizoram sawrkarin hmasawnna hna tam tak a thawk a, hmachawp pawh engemawzat a la nei a, chung zingah Chief Minister-in Armed Veng Community Centre, veng mipui te, thalaite leh a mamawhtu apiang tana hman tangkai theih tur a hawng chu lawmthu a sawi a, Armed Veng mipuite tana rohlu a tling a ni, a ti a. Community Centre thar sak a nih theih nana hma an lak dan te, a hmun an zawn dan te sawiin Pu R. Lalzirliana chuan tha taka he Hall sak zawh a nih theih nana tha leh zung, ngaihtuahna sengtute zawng zawng chungah lawmthu a sawi a ni. 

Pu Lalsawta pawhin bialtu MLA  a nih angin a bial chhung Armed Veng-ah Community Centre tha tak din a nih avanga lawmthu sawiin kum reilote chhungin sawrkarin a bial Aizawl East-II huamchhung veng hrang hrangah hmasawnna hna tam tak a thawk chu lawmawm a ti a. Sawrkarin retheite leh kut hnathawktute hlamchhiah lova NLUP leh NEDP hmanga chawikan hna a thawh zel avang te, mi tum ruh leh taimate dinchhuahna ram a nih theihna tura sawrkarin hma a lak vangtea lawmthu sawiin kan ram leh hnam min hruaitu atan Pathian chauh kan thlan ber zel theihna tura dil chu sawrkar leh mipui tawngtaina ni se a duh thu he hunah hian a sawi a ni. 

Armed Veng Community Centre sak nan hian Special Plan Assistance atangin cheng nuai 600 bakah State Priority Project atangin cheng nuai 40.01, a vaiin cheng nuai 640.01 hman a ni a. October ni 29, 2015 atanga sak tan niin June ni 30, 2018 ah zawh fel a ni. Building hian chhawng thum neiin a hnuai ber basement ah hian lirthei ke pali nei 12 leh ke pahnih nei 20 vel a dah theih a; ground floor-ah mi 132 thut theihna Conference Hall, MHIP Office, Local Council House, Table Tennis Hall, Taekwondo Hall, Committee Room leh choka dah a ni a; a chhawng chung berah hian auditorium a hman theih nghal basketball court leh green room dah a ni. 

Hawnna inkhawmah hian sawrkar mi pawimawh engemawzat bakah Armed Veng khawtlang hruaitute, tlawmngai pawl hrang hrang hruaitute leh mipui thahnem tak an tel. UD&PA Executive Engineer Pu C.Malsawma’n Technical Report a pe a, Armed Veng Local Council Chairman Pu R.Vanthuama’n thu sawiin Armed Veng Branch YMA President Pu Z.Lalchhuanawma’n lawmthu a sawi bawk a ni.