2695/2026-2027
Kolasib, 15th October, 2026: October ni 12, 2026 (Thawhlehni) khan "The Mizoram Fisheries Amendment Act 2022, Section 6(1)(b)" bawhchhetu mi pathumte chu hrem an ni.
Heng dan bawhchhetute hian October ni 6, 2026 khan Thingdawl ram chhunga Hmawngkai lui leh Tuikhuahmawng lui-a chakaite chu tur (Glycel) hmangin an hrai a. District Fisheries Development Officer (DFDO), Kolasib leh Thingdawl VC-I ten ngawrh taka an chhui zui hnuah mi pali—Ngaithanmangi (w/o Zothanpuia, Thingdawl Kawnveng), Vanlalkimi (d/o Ruala, Sesawng Vengthar Tlangveng), Ruthi Lalawmpuii (d/o Vanlalkimi, Sesawng Vengthar Tlangveng) leh Lawmzuala (s/o Lalchangliana, Sesawng Vengthar Tlangveng) te chu DFDO Office, Kolasib-ah koh an ni.
An zinga mi pathumte hi lo kalin, dan an bawhchhiat dan hrilhhriat an ni a, intiamkamna neih tir an nih hnuah 'The Mizoram Fisheries Amendment Act 2022, Section 10 - Compounding of Offences' hmangin Rs. 2,000/- (Cheng sanghnih) theuh chawitir an ni. A palli-na, Lawmzuala s/o Lalchangliana hi a tlanbo avangin Kolasib Police Station-ah thlen tawh a ni a, tunah hian zawn mek a ni bawk.
District Fisheries Dev. Officer, Kolasib District chuan kan ram luidung nungchate an lo pun zel theih nan, phalna (License) tel lo chuan luidung nungcha man, tihbuai leh thah chu danin a khap tlat a ni tih mipuite a hriattir nawn a ni.
