4992/2025-2026

Kolasib, March 24: Vawiin khan Parish Hall, Kolasib-ah khawvel puma hman ṭhin 'World TB Day' denchhenin Kolasib District chhunga 'TB Free Village' lawmna inkhawm buatsaih a ni a. He hun hi Pu Lalmuanpuia, Project Director, DRDO leh Kolasib Deputy Commissioner mawhphurhna la mektu chuan khuallian niin a hmanpui.

Khuallian Pu Lalmuanpuia chuan thu sawiin, kum 1882, March ni 24-a Dr. Robert Koch-an TB natna hrik a hmuhchhuah ni chu khawvel pumah World TB Day atana hman ṭhin a nih thu a sawi a. "Tun hma chuan TB hi natna upa tawh tak leh thihpui ngei ngei ṭhin a nih laiin, tunah chuan ṭha taka enkawl dam theih a ni tawh a. India rama mithiam ten TB enkawlna kalhmang an hmuhchhuah hi ram dangte pawh in ṭha an tiin an entawn hial a ni," a ti.

Khuallian chuan TB natna hian mi a tih thih ṭhin bakah ram economy thlenga a nghawng chhiat ṭhin avangin, a hma thei ang bera hmuhchhuah leh enkawlna lak vat a pawimawh hle tih a sawi a. TB enkawlna leh damdawi chu a thlawn vek a nih bakah, ṭha taka treatment late chuan sawrkar aṭangin lawmman an dawn theih thu a tarlang bawk. He hunah hian Khuallian chuan 'TB Mukt Bharat Abhiyaan Phase 2' a hawng nghal a ni.

He inkhawm, Dr. R.K. Lalthlamuana, Senior CMO kaihhruaiah hian kum 2025 chhunga Kolasib district-a TB umbo a nih theih nana 'TB Mukt Bharat Abhiyan Phase 1' hnuaia hmalakna hrang hrang report ngaihthlak a ni a. Tarlan a nih danin, test neih mi 2696 zingah mi 188 ten TB an vei tih hmuhchhuah an ni a. Heng zinga mi 13 te hi MDR-TB (TB damdawi pangngaiin a chhan tawh loh) an ni. Kum kalta chhung khan he natna vanga nunna chan mi 8 an awm bawk a ni.

World TB Day pual hian Kolasib District chhunga Village Council 27 te hnenah 'TB Free Village' chawimawina trophy leh certificate sem a ni a. Kum khat TB laka fihlim (TB Free) te hnenah Bronze trophy, a zawna kum hnih fihlim te hnenah Silver trophy hlan an ni a; a zawna kum thum ngawt TB awm lohna khuate hnenah Gold trophy leh certificate hlan an ni bawk.