Nimin khan Kolasib Bawrhsap Pu Zoengsanga leh Counter Insurgency Jungle Warfare School (CIJWS) hotute chu CIJWS Vairengte ah an inkawm.

Bawrhsap leh a thawhpui te chu CIJWS Dy.Commandant Brigadier Salim Asif leh Colonel Manoj Handa te nen inkawmin CIJWS hmunhma bul vela mimal ram chungchang an sawiho a, Bawrhsap chuan henglai bawr vela mimal hminga ram awm ni a tarlan te chu enfel leh tehfel mek a nih thu a tarlang a, Dan Rorelna khawl (Court) thupek zawm thlapin hmalak ani a, felfai takin a hma thei ang bera tihfel a beisei thu a tarlang bawk.

Colonel Manoj Handa chuan CIJWS chu Khawvela Sipai te training hmun hmingthang leh chhuanawm anih thu a tarlang a, khawvel hmun hrang hrang atangin Sipai te training turin an rawn kalkhawm thin a ni tiin Mizoram tan pawh  inchhuanna tham a tling a ni a ti. Chutih laiin CIJWS hmunhma bul vela ram neitu diktak chu an ngai pawimawh hle ani tiin dan bawhpel in a ram laksak tumna a awmlo a, ram hi laksak an nih dawn pawhin dan hnuaia fel fai taka laksak nise Ram neitu diktak te chu an phu tawk zangnadawmna pawh pek ngei nise tha a tih thu a tarlang bawk.

Bawrhsap hi Kolasib SDO(Sadar) , Settlement Officer charge la mek Pu V.Laldinsanga, Vairengte SDO (Civil) Pu Isaac Lalrempuia, District Sainik Welfare Officer Maj (Rtd) Caroline Z.Pachuau, SDC Pi R.Lalnunkimi leh DIPRO Pu Collin Hlychho ten an tawiawm a ni.

Attachment

  • Loading attachment...