3941/2023-2024

2024 Ramtuk thla ni 23: Vawiin khan Mizoram Cultural Organisation (MCO), Sub-Headquarters, Kolasib te'n St Joseph's Parish Hall, Kolasib-a an kum 25 tlin, Silver Jubilee lawmna hun an buatsaih chu Kolasib District Bawrhsap Pu John LT Sanga, Kolasib Sub-Headquarters MCO Patron ni bawk chuan Khuallian niin a hmanpui.

Bawrhsap Pu John LT Sanga chuan Mizo hnam ziarang leh nunphung vawng nung tura pawl din chu ropui leh hlu a tih thu sawiin, chuti anga pawl din, MCO Sub-Headquarters Kolasib-in Silver Jubilee an thleng chu a lawmpui tak zet tih a sawi a. Hruaitute leh member-te inpekna fakin, Kolasib District timawi ṭhintu an nih avangin lawm thu a hrilh a, an kal zelna turah duhsakna a hlan nghal bawk.

Kolasib Sub-Headquarters MCO Patron Pu John LT Sanga chuan mihringte hi culture siamtu kan ni a; chutih rual chuan culture hian mihringah min siam a ni tiin, kan culture hi hnam damna leh hma sawn zel tura hnam min chawmtu a ni, a ti a. Khawvel hma sawnna chak taka a kal rualin, mahni hnam ziarang leh nunphung (culture) vulh lian thiam apiang hnam zahawm an ni zel ang tiin; culture chu hnam lam emaw, hnam thuam inbel ringawtah emaw ni lovin, ni tin khawsakphung leh nungchangah a lang chhuak tur a ni a, khawi hmunah pawh awm i la, kan hnam ziarang leh nunphung kalsan lova kan chhawm nun zel a pawimawh a ni, a ti.

He huna khual zahawm, Kolasib Sub-Headquarters MCO Founder President Dr C. Lalzarliana chuan MCO hminga an chet chhuahna aṭangin hnampui zawkte'n Mizo zai, lam leh ziarang hrang hrang an ngaisang tih a hmuh thu sawiin, MCO hma lakna chu mimal mawina tur ni lovin, khawtlang mawina leh hming ṭhatna tur a nih thu a sawi a. Concrete in chhungah suit nalh tak ha chungin culture a vawn him theih tih sawiin, ṭhangtharte chu hnam ziarang leh nunphung zahpui lova vawng nung zel turin a chah a ni.

Silver Jubilee lawmna hunah hian MCO General Headquarters leh Kolasib Sub-Headquarters hruaitute, Kolasib Sub-Headquarters MCO hnuaia club hrang hrangte, hruaitu hluite leh pawl hrang hrang hruaitu sawm bikte an tel a. Sub-Headquarters MCO President Pu C. Lalrinkima'n inlawmna thu sawiin, UPC (NEI) pastor Rev. C. Lalmuanpuia'n hunserh a hmang a. Hruaitu hlui chatuan ram pan tate sunna hun hman niin, silver jubilee souvenir pho chhuah a nih bakah, kum 1999 - 2024 inkar chhunga Sub-Headquarters MCO hruaitu (office bearer) lo ni tawh mi 29 te hnenah chawimawina thuziak hlan a ni a. Sub-Headquarters MCO Secretary Pu R. Lalthantluanga'n report pein, MCO General Headquarters Vice President Pu John Saikhuma'n thu a sawi bawk a. Chawhnu lamah cultural programme hman niin, club hrang hrang leh mimal aṭang te'n hnam lam leh zai thlir ho va, ngaihthlak ho a ni a. Tlai lamah silver jubilee lawmna ruai kil ho a ni bawk.

Kolasib Sub-Headquarters MCO hi kum 1999 February ni 23 khan 'Mizo Cultural Club Union, Aizawl North District' tih hming puin Kolasib DAO Pu C. Lalzarliana inah Kolasib khawpui chhunga cultural club pali - Venglai, Diakkawn, Vengthar leh College Veng hruaitu kal khawmte'n an din a ni a. Aizawl North District chu Kolasib District tia thlak a nih tak avangin kum 1999 June ni 23 khan 'Kolasib District Mizo Cultural Association' tiin thlak zui a ni a. Kum 2000 September ni 15 khan Aizawl lama pawl ding tawh sa, Mizo Cultural Organisation-ah inchhung lutin, 'Mizo Cultural Organisation, Sub-Headquarters, Kolasib' tih a lo ni ta a ni. Tunah hian Kolasib Sub-Headquarters MCO hnuaiah hian inziak lut branch/club 23 an awm mek a ni.