No.2854/2020-2020

Vawiin chawhma khan Kolasib DC Conference Hall-ah khawlaia thil zuar, Street Vendor-te intundinna tur a sawrkar laipui Scheme ‘PM Street Vendor’s AtmaNirbhar Nidhi (PM SVANidhi)’ chu kalpui tan thei turin Bawrhsap Dr H Lalthlangliana chuan a hawng. Bawrhsap kaihhruainain DAY-NULM Task Force Committee on Self Employment Programme (SEP) thukhawmna neih nghal niin, khawpuia miharsa zawkte’n eizawnna ngelnghet an neih theih dan tur rel a ni.

Kolasib Bawrhsap Dr H Lalthlangliana chuan Bank chu nitin a mipuite nen a indawrtawnna kalpui rengna hmun pawimawh tak a nih thu sawiin thawktute pawh taimak an chhuah chhunzawm zel a tul thu a sawi a. Mipuitena anrin ngam bank chuan dawrtu pawh an ngah thin a, dawrtu ngah Bank nih hi chawimawina a ngaih tur a nih rualin min dawrtute lo dawnsawn leh ngaihven kawngah pawh tan kan la zual sauh sauh tur a ni, a ti.

Pu Gaston Vanlalhriatpuia, DUDO Kolasib chuan programme pawimawh tak tak pahnih, PM SVANidhi leh SEP chungchang rel tura kalkhawm Committee member-te lawmna thu sawiin, tun dinhmunah Kolasib Street Vendors zingah Stationary Vendors 67, Mobile Vendors 15 leh Temporary Vendors 38, an vaiin 120 an awm thu a sawi a. PM SVANidhi chu loan cheng 10,000/- thleng lak theihna, a pung tlem thei ang ber, Street Vendor-te chawikanna tur a siam a nih thu leh khawpuia cheng miharsate tan SEP kaltlanga Individual Loan Rs 2,00,000/- thleng lak theih a nih thu te, Group Enterprise leh SHG-Bank Linkage anga loan dil theih dan te sawiin, loan pung tlem thei ang ber sawrkar puihna tel a pek tum a nih thu a sawi. Bank-te chu sawrkar duan Scheme kaltlanga loan diltute tan a theihtawp chhuahpui tur leh loan pek kawnga inhawng turin a ngen nghal bawk a ni.

PM SVANidhi hi khawlaia thil zuar leh inpho thinte hripui Covid-19 len avanga inkharkhipna kalpuinain an eizawnna nasa taka a nghawng te, eizawnna bul tansak lehna tur tinzawn leh chhawmdawlna tura sawrkar laipui programme duan pawimawh tak a ni a, June Ni 1, 2020 a kalpui tan a ni a. Street Vendor-te’n leirem an rah theihna tur Scheme kaltlang hian Street Vendor-te intundin nan a pung hniam thei ang bera Working Capital Loan Rs 10,000/- thlenga pek theihna tura duan a ni a. Loan term kum khat, 7% interest subsidy bank loan lak nana Guarantor ngai lo a ni a, sum chevel buaipui kawnga Mobile Apps hmang thinte lawmman pek a tiam bawk a ni. Dil thei chu March Ni 24, 2020 hmalam a khawpui kawngsir/khawlaia thil zuar thin Vending Certificate/Identity Card (ID) Town Vending Committee (TVC)/Urban Local Bodies (UBC) in a pekte emaw, hetiang neilo pawhin Vendor Survey list-a awmte, Survey laia inziaklut hmanlo TVC leh UBC in Letter of Recommendation (LoR) a pekte tan leh khawpui leh a chhehvel, thingtlang thlenga TVC/ULB te huam ve chiah loa khawpuia Vendor-te tan pawh a dil theih a ni. He ruahmanna hi March 2022 thlenga hman tura duan a ni a. Loan hi Rs 10,000/- thleng kum khat chhunga a pung tlem thei ang ber nena rulh tur a ni a. Eng mah dahkham angai loa, loan rul tha tan leh tlingtla hma tan a pung hi a aia hniamin tihsak tur niin, loan an la leh duh anih pawhin a hma aia tam puk tir theih an ni ang. Hrechiang duh tan DUDO Office, UD&PA Department, Kolasibah zawhfiah theih a ni ang.

Vawiin vek khan thukhawm chuan DAY-NULM kaltlanga khawpuia miharsate chawikanna tur mimal leh Self Help Group (SHG) ten eizawnna ngelnghet neia an intundin theihna tura Loan pek theihna Self Employment Programme (SEP) chungchang an rel nghal a. Meeting-ah hian Financial Year 2020-2021 chhunga Kolasib khawpui huamchhunga Bank Branch hrang hrangte target chungchang sawiho niin, hemi hun chhung hian mimal 65, Self Help Group 20 leh Group Enterprise (GE) 13 te tan loan pek chhuah hman nise a ti a. Bank Branch hrang hrangte dinhmun ngaihthlak anih hnuah Bank tinte pek chhuah dan tur pawh bithliah fel nghal a ni. SEP kaltlanga Loan hi 7% Interest Subsidy Loan la tuin a rul anga, a bak zawngte sawrkarin a lo do let ve dawn a ni.

Attachment

  • Loading attachment...