447/2025-2026

Dated Kolasib the 2nd May, 2025: Vawiin khan Kolasib DC, Pu Robert C Lalhmangaiha hona hnuaiah MJA Kolasib District leh YMA Sub Hqrs hruaituten Bilkhawthlir leh North Chawnpui inkar inkalpawhna kawng thawmthat hna kal mek an en hova. Hemi hnu hian Saihapui V Border outpost tlawh nghal in, Outpost Duty te nen inkawmna an nei nghal a ni.

Vawiin a Bilkhawthlir to North Chawnpui tlawhna ahhian DC chuan PWD aiawh tawiawmtute, Contractors leh Khawtlang hruaitute chu theihtawpa tang ho a infinchhuah thin turin a chah a. An kawngpui en chu Bukpui tlangdung, saipum leh saiphai thleng in an hmang vek a, chu mai piahlamah kumin kum tawp lamah CYMA General Conference Sakawrdai a awm tur atan inkalpawhna kawng pawimawh tak pakhat a ni dawn a, chuvang chuan a hma thei ang bera kawng tha neih chu a pawimawh takzet a ni, a ti.

Contractor te hnenah pawh lungtha hmang tura chahin, fur ruahtuiin a tihchhiat nghal mai theih loh tura tlo taka siam turin a hrilh a, an hnathawhna tibuai thei tur thil te sawrkar ah thlen  hreh lo turin a hrilh bawk.

DC hian Saihapui V a Border Outpost tlawh nghalin SDPO, Pu Lalnunpuia leh Police duty te nen inkawmna an nei nghal a.. Duty te chu an hnate rim taka an thawk chu a lawmawm takzet a ni tiin, an duty na hmun chu hmun pawimawh tak, ramri buai thil thu ah pawh Mizoram luhka a nih avangin  an tha thlah lo turin a chah bawk.

Vawiina DC hova Bilkhawthlir to North chawnpui inkar kawng an en hi PMGSY 2.0 hmanga siam a ni a. A kawng thui zawng hi Km 17.6 niin, mtr 3 a zau a ni a. A kawng siam nan hian Cheng nuaih 2421.49(Rs 2421.49 lakh) sanction a ni. Kawng hi siam zawh tawh ni mahse, kawng chhe lai a awm nual avang hian contractor te hian an Defect Liability period , kum 5 chhung a zawh hma chu kawng hi an enkawl rih a. Kawngpui en bakah hian Cheppui leh Chepte a lei dawh mek pawh en nghal niin, Cheppui hi dawh zawh tawh a ni a, Chepte lei hi thla khat hnua zo thei tura ruahman a ni.  

Chepte Lui-a lei dawh mek, nikum lama dawh zawh tawh tur la thawh tan hleitheih loh pawh DC chuan a hmunah kalin thil awmdan a en fiah a. Lei dawh hna thawktu Dr. R. Lalthlamuana, Blue Hills Engineering chuan thil awmdan sawi fiahin, Chepte Lei hi a tirah steel bridge-in, 22 meters-a seia dawh turin, NABARD hnuaiah  ruahman a ni a ti a. Khawtlang hruaitute ngenna angin a hmun sawn a nih avang leh a foundation lei a nem avangin lei dawh tur hi ruahman (design) thar leh a ngai a. Department (PWD) lamin an ngen angin a design that leh vek thu leh chu design chu nikum December thlaah pawm a nih tak chauh avangin, NABARD sanction hi nikum October thla khan a lo tawp hman avangin a hranpain Detailed Project Report (DPR) siam thar leh a ni a, tunah hian NABARD lamin an sanction leh hnai tawh a, hna tan leh thuai an tum niin a sawi.

Vawiina DC hova kawng enna ahhian DC hi DIPRO Pu David A Lalhmingchhuana, SDPO, Pu Lalnunpuia, PWD SDO, Pu Lalthanpuia Khiangte, MJA Kolasib, Sub Hqrs YMA leh cohtractor ten an tawiawm a ni.