1664/2023-2024

Kolasib dated 26th August 2023: Vawiin chawhma khan College Veng, Kolasib ah Local Administration Department hmalakna hnuai ah Semi Indoor Stadium Volleyball Court sakna tur lungphum phunna hun hman niin Pu John LT Sanga, Deputy Commissioner chu khuallian a ni a, Pu ST Lalhmingmawi, DLAO chuan hun a kaihruai a ni.

Deputy Commissioner Pu John LT Sanga chuan Kolasib district-in infiamna kawng a hmasawnna bung thar a kai theihna tur a LAD Minister hmalakna leh KODVA hruaitute hmalakna chu lawmawm a tih thu sawiin heng hmalaknate a tak a tih puitlin a nih theih nana a hmunhma lo ruahman saktu College Veng YMA hruaitute inpekna chu fakawm a tih thu a sawi. Infiamna chu taksa leh rilru hrisel neih nana thil pawimawh tak a nih bak ah naupang leh ṭhalaite theihna haichhuah leh tih punna hmanraw ṭangkai a hmang turin Sports Association hruaitute chu a chah bawk a ni.

College Veng Semi-Indoor Volleyball Court hi LAD Department hmalakna hnuai a sak tur niin metre 26 a sei, metre 17 a zau tur a ni a. Cheng nuai 28 seng a sak zawh tur a ruahman niin kumin chhung a sak zawh tur a tih a ni bawk. He hun ah hian Pu Lalrinmawia Ngente, President, Kolasib District Volleyball Association-in kalkhawmte lawmna thu sawiin Pu R.Zarzoliana, President, College Veng branch YMA in thusawina hun a hmang bawk a ni.