3508/2022-2023

Kolasib dated 7th February 2023: Vawiin khan Assam sawrkar ruahmanna a Assam leh Arunachal Pradesh inrina Sonitpur district-ah leh Assam leh Mizoram inrina Hailakandi district-a inpawhna leh inlaichinna țha a awm theih nana Border Festival buatsaih tura a rel bawhzuina chu kalpui niin Pu Sazum Uddin Lasker, MLA, Katlicherra Assembly Constituency leh Pu John LT Sanga, Deputy Commissioner, Kolasib chuan Assam-Mizoram Border Festival, Abhijit Nag Mini Stadium, Manipur, Katlicherra-ah khuallian niin an telpui a. Pu Nisarg Hivare, IAS, Deputy Commissioner, Hailakandi chuan hun a kaihruai a, Hailakandi district leh Kolasib district-a Sawrkar Official țhenkhatte he hun ah hian an tel bawk a ni.

Pu Sazum Uddin Lasker, MLA, Katlicherra chuan ramri a ralmuanna a awm theih nan Border Festival, Katlicherra-a buatsaih ang hian Kolasib district-a buatsaih ve a țul thu sawiin hnam ziarang inzirtawnna leh induhsaktawnna lantirna chuan inpawhna leh inunaunna țha a hrin chhuah zel a beisei thu a sawi a. Mizoram chu țum engemaw zah a lo tlawh tawhna ațangin Mizote chu hnam rinawm leh fel tak nia a hriat thu sawiin Kolasib district atanga Border Festival chhim tur a lo kalte chungah lawmthu a sawi bawk a ni.

Pu John LT Sanga, Deputy Commissioner chuan ramri ah ralmuanna a awm theih nan Sawrkarin hma lain Deputy Commissioner inkarah pawh inbiakna țha tak kalpui țhin a nih thu sawiin ramri hnaih a huan, lo, ram neite pawhin an huan te pawh harsatna awm lo in an enkawl chhunzawm chho zel nia a hriat thu a sawi a. Inbiakna mumal tak kalpuina chuan harsatna sutkian kawngah inhriatthiamnate, thawhhonate leh inpawhna țha a hrin chhuah țhin thu sawiin Border Festival chuan ramria district pahnihte inkarah inpawhna țha zawk a siam ngei a beisei thu a sawi bawk a ni.

Assam - Mizoram Border Festival hi țum khat buatsaihna niin ramria district awmte inpawhna leh inkungkaihna țha zawk siamna tur a ruahmanna a nih bak ah insumdawn tawnna leh sawrkar hnathawkte indawrtawnna hun țha siam nana buatsaih a ni a. Hnam ziarang pho lanna hun te neih niin Hailakandi district leh Saidan FC ten football friendly match te an nei a. Assam sawrkar hnuai a Department hrang hrang hmalakna phochhuakin Stall țhahnem tak siam a ni bawk.