3509/2022-2023

Lunglei the 7th February’ 2023: Vawiin khan District Sericulture Office, Lunglei buatsaihin Excise & Narcotics Conference Hall, Lunglei ah High Powered Committee (HPC), Lunglei bultuma Pangang khawi tura hmalakna Eri Seed Development Project chu khuhhawnna hun hman a ni. He hun hi Pu C. Vanlalmuana, Chief Planning Officer, High Powered Committee, Lunglei chuan khuallian niin a hmanpui.

He hun hi Pu B. Lalchhuana, District Sericulture Officer, Lunglei chuan kaihruaiin khuallian Pu C. Vanlalmuana chuan Sericulture Department in kuthnathawktute tana pangang khawi lama project tha tak an chhawpchhuak hi lawmawm a ti a, eizawnna nghelnghet atan a hmantlak leh dinchhuah theihna tur a ni a ti bawk. HPC hian Line Department hrang hrang te kaltlangin kuthnathawktute tan eizawnna tur a ngaihtuah sak thin thu a sawi a, nikumah pawh khan HPC bultuma pangang khawi tur mi 10 thlan chhuah te pawh in hma an la tha a, hun reilo te chhungin hlawhtlinna an hmu a, tuna pangang khawi tura thlan te pawhin ram tan leh keimahni tan tih hre renga taima taka thawk a dinchhuahpui theuh turin a chah a ni.

Pu C. Vanlalmuana hian Lunglei District atanga HPC bultuma pangang khawi tura thlanchhuah mi sawm (10) te hnenah lo vahna, halna leh thil danga hmantur atan Rs 9880/ theuh a sem a ni.

Pu B. Lalchhuana, DSO, Lunglei chuan Eri Development hian Eri Silk tharchhuah tihpun, kumtin ram tichereu tih tlem leh pangang khawitute thawhchhuah tihpun te hi a tum ber a ni a ti a. Nikuma HPC bultuma pangang khawi tur a thlanchhuah mi 10 ten hun reilo te chhungin Rs 76245/= man an thar chhuah thu a sawi a, Eri Development hian kumkhat ah pangang vawi li ai tlemlo khawi tir tum a ni a ti bawk. HPC bultuma pangang khawi tur te hi Rs 1 lakh ( Pawisa leh hmanrua) pek tur an ni a ti.