452/2023-2024

Kolasib dated 15th May 2023: Vawiin chawhnu khan Project Veng, Kolasibah Pu John LT Sanga, Deputy Commissioner chuan Apex Bank Automated Teller Machine a hawng a. Pu C.Lalthanpuia, Assistant General Manager, Apex Bank chuan hun kaihruaiin Project veng khawtlang hruaitute leh tlawmngai pawl hruaitute he hun ah hian an tel a ni.

Pu John LT Sanga, Deputy Commissioner chuan District Consultative Committee kaltlanga Bank hrang hrangin Sawrkar hnuai a hmathatna an pek chhuah dan leh mipui tan a sawt lehzuala hma an lak theih dan sawi ho thin a nih thu tarlangin DCC kaltlanga rawtna siam angin ATM booth thar pawh hi bun a nih thu a sawi a. Project veng chu Sawrkar office awm tamna leh hmunhma pawimawh tak tak awmna hmun a nih angin ATM mamawhna a nasat thu Apex Bank hotute hnen ah hriattir a nih thu leh heng ngenna te an rawn tihlawhtling ta chu lawmawm a tih thu a sawi. ATM chu khawtlang tan a thil tangkai tak a nih angin a enkawl leh vil kawngah pawh khawtlang anga tanrual a pawimawh thu leh neitu nihna thinlung puchung a uluk tak a hmang turin kalkhawmte a chah a ni.

Pu C.Lalthanpuia, Assistant General Manager chuan Project Veng a ATM chu Apex Bank hnuai a ATM 26-na a nih thu tarlangin Brig. C.Vankunga Shopping Centre, Diakkawn a ATM dah chu ATM dang inhnaih tak taka a awm avangin a la rem rih loh thu a sawi. Apex Bank ATM-te chu Mizo leh English tawng hman theih a nih thu te, ATM hman chhungin ATM Card chu khawl ah a inbarh reng a ngaih thu te leh thla 1 chhungin a thlawnin vawi 5-a hman theih thu a tarlang a. ATM chu khawl enkawl uluk ngai tak a nih thu leh a chhia siam a hautak thu sawiin Project veng tan a khawl tangkai tak ni turin duhsakna a hlan bawk a ni. Project Veng Apex Bank ATM hawnna hun ah hian Pu JD Traite, District Development Manager, NABARD, Pu Laldawngliana, Ex- Vice Chairman, Managing Board leh Pu David Lalhmingmawia, Vice President, Village Council, Project vengten thusawina hun an hmang a, Pu C.Malsawma, Manager, Apex Bank, Kolasib chuan lawmthu sawina hun a hmang bawk a ni.