573/2024-2025

Kolasib dated 27th May, 2024: Vawiin chawhma khan Pu John LT Sanga, Deputy Commissioner chuan Tuichhuahen fintu, Diakkawn bazar luikawr leh College Veng luikawr thenfai hnatlang a thawkchhuak tur, ‘ECO CLUB – Save Tuichhuahen Project’, Govt. Kolasib College zirlaite chu, Govt. Kolasib College tualzawl atangin a vai liam.

Pu John LT Sanga, Deputy Commissioner chuan mihring leh nungchate chu zalen tak a khawsa ho tur an nih thu sawiin nungchate khawsakna hmun ram ngaw tih chereu zel a nih loh nan humhalh tur a kan thanharh a tul thu a sawi a. Boruak tha leh tui thianghlim min petu ram ngaw humhalh chu mi tin mawhphurhna a nih thu a sawi. Govt. Kolasib College Eco- Club-te hmalakna a ‘Save Tuichhuahen Project’ hlawhtlin nana zirlai leh zirtirtu hnatlang a kal chhuak tur zawng zawngte chung ah Deputy Commissioner chuan lawmthu sawiin an hmalakna chuan tui hna leh ram ngaw humhalhna kawng ah Mizoram hmun hrang hrang a thalaite thinlung a kai harh ngei a beisei thu a sawi bawk a ni.

Hun kaihruaitu Pu T.Zahmingliana, Principal, Govt. Kolasib College chuan Eco Club-te hmalak tawhna tarlangin College hmunhma chu thing leh nungcha zalen tak a an awm theih nan thing tiak chi hrang hrang phun leh a humhalh hna an kalpui thin thu leh nungcha humhalh tur a midangte zirtir tur a hma an lak thin thu a sawi a. District Green Champion chawimawina te pawh an lo dawn tawh thu a sawi bawk a ni. ‘Save Tuichhuahen Project’ hnatlang a chhuak tur hian zirlai 40 chuang an inziaklut a, Eco Club hruaitute leh zirtirtu engemaw zahin an telpui bawk a ni.