710/2023-2024

Kolasib dated 7th June 2023: Vawiin khan Pu Madhup Vyas, Chief Electoral Officer chuan MLA Election neih tur a inbuatsaihna hrang hrang kalpui dan endikin Kolasib a tlawh a. DRDO Conference Hall, Project Vengah 4-Tuirial, 5-Kolasib leh 6- Serlui Assembly Constituency-a Electoral Registration Officer, Assistant Electoral Registration Officer leh Booth Level Officer thenkhatte nen inkawm hona hun an hmang a. Pu John LT Sanga, Deputy Commissioner chuan hun kaihruaiin Pu Anmol Srivastava, OSD to CEO leh Pu Lalrinawma Traite, SP-te he hun ah hian an tel a ni.

Pu Madhap Vyas, CEO chuan Mizoramah inthlanna langtlang leh felfai a awm theih nan inthlan buaipui tur a mawhphurhna nei zawng zawngte chuan Election Commission of India-in inkaihhruaina a duan hrang hrangte chhiar tam turin a chah a. Kolasib district-a thuneituten Electoral Roll ennawnna an kalpui dan leh Electoral Roll rintlak siamna kawnga an hmalakna chu lawmawm a tih thu a sawi. CEO chuan inthlang tur a inbuatsaihna hmasa atan June ni 13 atang khian First Level Checking (FLC) of EVM kalpui tan a nih tur thu tarlangin hna tha tak a kalpui a nih theih nan fimkhur tak a endik hna thawk turin a chah a. Kolasib district chhung ramri ahte ralmuanna leh boruak tha a awm zel theih nan District thenawm a thuneitute nen thawhhona tha nei zel turin a chah bawk a ni. Pu Madhap Vyas chuan Kolasib district chhunga Polling Station tin ah hnathawh theih tur a mamawh hrang hrang, ‘Assured Minimum Facilities’ awm vek tur a nih thu leh hmeichhe vote thlakna tur bik ‘Pink Polling Station’ leh Polling station tha tak a thuam ‘Model Polling Station’ siam tur a nih thu a sawi a. Voter zaa 85 talin vote an thlak theih nan tan la turin leh inthlan hnuhnung ber a vote tlak tlemna Polling Station-te zir chiang turin kalkhawm te a chah.

Vawiin thutkhawm ah hian ERO, AERO leh BLO-te inbuatsaihna kalpui dan sawi ho a ni a, FLC kalpuina hmun tur te, EVM dah thatna ‘Strong Room’ te, Vote chhiarna hmun tur a ruahman ‘Counting Hall’ leh Kolasib khaw chhunga Polling Station thenkhat a hmun ah a endik a. Bru Voter Electoral Roll atanga hming paih hna kalpui dan te sawi ho a ni bawk.

January ni 13, 2023-a Final Publication-a tarlan danin Kolasib district-ah hian Voter 63356 an awm a, Polling Station 89 a awm bawk a ni. 4-Tuirial ah Voter 18472, 5-Kolasibah 23731 leh 6-Serlui Assembly Constituency-ah 21153 voter awm anga chhinchhiah a ni.