711/2023-2024

2023 Nikir thla ni 7: Kumin June thla chhunga Lawngtlai District-a STI, HIV, TB leh Hepatitis laka beihpui thlak (campaign) kalpui tur bul ṭanna hun chu vawiin khan CMO Conference Hall, Lawngtlaiah Lawngtlai Additional Deputy Commissioner Pu Abraham Beirazi Khithie hovin hman a ni.

He huna Khuallian, Pu Abraham Beirazi Khithie chuan STI, HIV/AIDS, TB leh Hepatitis te hi khawvela natna darh chak berte zinga mi an nih thu sawiin, Mizoram chu India ramah he'ng natna vei hmuh chhuah tamna ber state zinga mi kan nih thu a sawi a. He'ng natna a darhna hmun tam ber chu tan inah a ni fo tih sawiin, jail-ah tang thei tur zat bithliah aia tam tang an awm ṭhin avangin natna inkai darh a awl hle tih a sawi a. Jail tang mekte zingah leh home leh centre hrang hrangah te he'ng natna chungchang hi nasa lehzuala kan inhrilh a, a ven dan leh inenkawl dan te uluk lehzuala kan inzirtir a pawimawh tak zet tih a sawi a ni.

He Campaign bul ṭanna hun hi Lawngtlai District AIDS Control Officer Dr S. Thaizi chuan a kaihruai a. Khual zahawm, LIKBK Bazar Bialtu Pastor Rev. TH Vanlalzaua chuan Lawngtlai District-a he Campaign pawimawh tak kalpui turah hian sawrkar hma lakna tichak tura kohhrante'n tih theih an neih a awm chuan theih tawp chhuah an inhuam thu a sawi a ni.

He hunah hian Lawngtlai ART Centre-a Medical Officer Dr Malsawmtluanga chuan kum 2021 aṭanga 2023 May thla thlenga Lawngtlai District dinhmun report kimchang tak a pe a. Report-a a lan dan chuan February 2021 aṭanga May 2023 thlengin thisen test aṭanga HIV positive hmuh chhuah thar zat chu mipa puitling 225, hmeichhe puitling 117, mipa naupang 5 leh hmeichhe naupang 8 niin, an zavaiin mi 355 an ni a. He'ng zingah hian mipa 11 chuan vanduaithlak takin an nunna an chan tawh a. Lawngtlaiah ART Centre kalpui a nih tak avangin mi dangte hi chuan ṭha takin enkawlna an dawng mek a ni.

Kumin 2023 January - March thla chhung hian TB kai rinhlelh endik mi 5,156 awmin, an zinga mi 13 chuan TB natna an vei mek tih hmuh chhuah a ni a. He'ng TB natna vei mekte hian ṭha takin enkawlna an dawng mek a, TB avanga thi an la awm lo. Hepatitis C rinhlelh test tawh zat hi kum 2019 - 2023 May thleng khan mi 6,817 an ni a. He'ng zingah hian Hepatitis vei nem ngheh mi 340 an awm a. An zingah hian enkawl dam tawh mi 213 awmin, treatment la mek mi 132 awm a; treatment la miah lo mi 81 an awm thung. Hepatitis B rinhlelh test zat hi 6,731 an ni a. Heta ṭang hian mi 182 chuan Hepatitis B natna an kai tih hmuh chhuah niin, an zinga mi 31 chu enkawl dam tawh an ni.

National AIDS Control Organisation (NACO) aṭangin Prison & Other Closed Settings (jail leh home ang chi)-ah 2023 June thla chhung hian STI, HIV, TB leh Hepatitis laka beihpui thlak tura ruahmanna a awm angin Lawngtlai District chhungah pawh beihpui hi thlak a ni dawn a. Ruahman lawk dan chuan District Jail-ah te, ruihhlo ngaite enkawlna hmun (Drug De-addiction Centre) zawng zawngah te, Observation Home, Women & Child Development hnuaia Swadhar Greh, Ujjawalla leh One Stop Centre-ah te campaign hi kalpui a ni ang a. Campaign chhung hian a ṭul dan azirin STI, HIV, TB leh Hepatitis test kalpui tum a nih bakah, a ṭul a nih chuan health camp te pawh buatsaih turin ruahman a ni.