No.4120/2020-2021

Vawiin khan Kolasib district-a Independence Day lawmna hun chu DC Office tualzawlah hman a ni a, Er. Lalrinawma, Deputy Speaker chu khuallian a ni.

Deputy Speaker chuan, India in zalenna a neih theih nana hma latu mi ropui tak tak te chu ram tana rohlu leh an hmalaknate chu hriatreng a pawimawh thu sawiin,” Thangthar te tan chuan he zalenna hi he ram Pasaltha kalta te atanga kan thil thlawn pek dawn a ni a, zahna leh chawimawi a hriatreng hi an phu tak zet a ni,” a ti. Er. Lalrinawma chuan, ramin zalenna a hmuh hnua ram than chhoh zelna tur leh hma a sawn chhunzawm zelna tur a ngaihtuahna seng a, taima tak a tha thlah lova tan lak a tul thu a sawi a, “He ram mipuite beiseina leh duhthusam tihhlawhtling tur a rim tak a thawktute, ram hmasawnna, muanna leh hausakna atan a thawktu zawng zawng te zahna chibai ka buk bawk a ni”, a ti.

Covid-19 hrileng dona kawnga Sawrkar hmalakna hrang hrang tha tak a thlawp thintu, Task Force, NGO leh hemi kawng a sawrkar a thawktute chungah lawmthu sawiin,” Kolasib district chu Mizoram chhuahka pawimawh tak leh hmun pawimawh tak maiah in awm a, Kolasib district-in Zoram tan in hmalakna a chhuanawmin a ropui ka ti tak zet a, In chungah lawmthu ka sawi nawn leh tak meuh a ni”, a ti bawk.

Deputy Speaker chuan zalenna sual a Mizoram atanga pasaltha, mi hmasa te inpekna chu a ropui a tih thu sawiin, zalenna sual avanga nunna hlan leh Jail tang thenkhat tarlanna hun a hmang a, chung zingah chuan Lalsukthlah Syhlet jail-ah damchhunga tang tur a man hmasak ber te, Nikuala, Jahau Lal, Kalkhama Sentlang Lal, Lianphunga Lungtian Lal, Ropuiliani Sailo, Denlung Lal, Dokulha, Chinzah Lal leh Hnawnchheuhva, Vanphawng pasaltha te a sawi lang bawk a ni.

Er. Lalrinawma chuan District hmasawn nana Kolasib district Office hrang hrang hmalakna tarlanna hun a hmang a,”He hun hlu tak alo thlen hian ram leh hnam hmangaihna kawngahte, khua leh tui kan nihna a kan mawhphurhna kan hlenchhuahna kawngah te inhlan thar leh ila, ram neitu nihna thinlung pua he ram hi luah theuh turin kan insawm nawn leh a ni”, a ti.

Covid-19 hrileng avangin Kolasib district-a Independence Day 2020 lawmna inkhawmah hian mipui leh official tam zawk te an tel thei lova, School naupang atangin parade contingent march-past awm lo in, St Maria pipe band te leh Vengthar branch YMA zaipawl ten hun an hmang thung a ni.