No.4119/2020-2021

Dated Serchhip, the 15th August, 2020: Vawiin hian ram chhung hmun dangte rualin Serchhipah pawh India ramin zalenna a hmuh champha phak vawi 74 na chu tluang taka hman a ni a. A lawmna pui ber DC Office tuala buatsaihah Pu Lalchamliana, Honourable Minister, Home, Taxation, DM&R, etc., chu khuallian a ni.

Zing karah sawrkar pisa leh hmun thenkhatah te India hnam puanzar zar a ni a, Serchhip khawpui chhunga Home hrang hrang leh Hospitals ah te thilpek hlan an ni bawk a.

A lawmna pui ber chu DC Office tualah zing dar 11:00 am ah buatsaih zui a ni. He hunah hian Pu Lalchamliana, Home Minister, Hrangturzo A/C bialtu MLA ni bawk chu khuallian niin, hnam puanzar a pawtpharh a, Serchhip District chhunga Covid19 dona kawnga Community Quarantine Facility thawhtu kohhran paruk; Serchhip Kawnpui Presbyterian Church, Baptist Church of Mizoram, New Serchhip Kohhran, Baptist Church of Mizoram, Serchhip kohhran, Bethel Presbyterian Church, Serchhip, Principal Marian H/S leh Christ King Church Vacational Centre enkawltute hnenah lawmthusawina thilpek a hlan a, thuchah a sawi bawk.

Pu Lalchamliana chuan, hnam dang awpbehna hnuai ata zalenna kan hmuh ni champha, ni chhinchhiah tlak takah India ram hruaitu ropui tak tak te, zalenna sual chhuak tute zahna chibai a buk a. An thawh rah zalenna zarah thangthar ten hmasawnna nasa tak kan hmuh chhoh thu sawiin kum reilote hnuah chuan kan ram India chu khawvela ram thiltithei ber te zinga miah a inhlang kai ta hial a. Mizoram ngei pawhin hmasawnna duhawm tak tak hmunin vawiinah chuan India rama ziak leh chhiar thiam tamna state kan lo ni ta hial a ni, a ti. Khuallian hian tunhnai maia Mizoram leh Serchhip District in hmasawnna hmel a hmuh hrang hrangte a tarlang a. Mipuiten khawtlang leh ram ralmuangah hmasawnna hna an thawha nun hahdam tak an hmuh zel theih nan khawtlang venhimna hna Police Department kaltlanga nasa taka thawh a nih thu sawiin, Serchhip district police te pawh nasa taka thuam thar an nih thu a sawi. Zu leh ruihhlo laka kan thalaite an him theih nana Police department, Excise & Narcotics, tlawmngaipawl hrang hrang leh mipuite thawh hona tha tak chu fak tlak a nih thu a tarlang. Hriselna hi rohlu a nih avangin hriselna lamah hma kan sawn theih nan hmalakna thar tam tak sawi tur a awm tih tarlangin, Serchhip District Hospital ah Trauma Centre tihzauh hna thawh mek a nih thu leh, he Centre zauh hna hi zawh a nih hunah Operation Theatre leh ICU kum 5 awmna dah a nih tur thu a sawi a ni. Tunlaia khawvelin a buaipui mek Covid19 dona kawngah pawh sawrkar hmalakna leh ram mipuite thawh hona tha tak avangin nunna chan kan la awm loh thu a sawi a, Covid19 dona kawnga kan hmatawngte inpekna fakin he niah hian zahna chibai a buk a ni. He hripui hian engchennge min chen chilh dawn tih hriat a nih loh avangin kan tan ho that zel a tul thute, himna tura tihturte tha taka kan zawm zel a pawimawh thu a tarlang a ni. Heng bakah hian khuallian hian a department chan chhunga tun hnaia hmasawnna hnathawh hrang hrang leh ruahmanna awm te a tarlang bawk.

Pu Lalchamliana hi a nupui Pi Nuchhungi te, Pu Kailiana Ralte, Commissioner of State Tax te, Pu John LT Sanga, Director, DM & R leh mi dangten an tawiawm a. A lawmna inkhawm hi Serchhip Bawrhsap Pu Kumar Abhishek, IAS, Pu R. Sathiyasundaram, IPS, SP, Pu Lalmuansanga Ralte, MCS, Addl DC leh Serchhip khawpuia Head of Offices te leh Media mite an tel a . A lawmna pui ber DC Office tuala neih zawh hnu hian sawm bikte pualin DC Bungalow ah VIP’s at Home Tea Party neih zui leh a ni.