1613/2023-2024

Kolasib dated 23rd August 2023: Vawiin chawhma khan DC Conference Hall, Kolasibah September ni 5-a ‘Teachers’ Day 2023’ lawm dan tur relin District Level Committee on Celebration of Teachers Day chuan thutkhawmna an nei a. Pu John LT Sanga, Deputy Commissioner chuan hun kaihruaiin Pi K.Lalsiamliani, District Education Officer chuan report a pe bawk a ni.

Pu John LT Sanga, Deputy Commissioner chuan zirtirtu hna chu hna zahawm leh ropui, ni bik nei eizawnna hna tlemte zing ami anih thu sawiin zirna hi chhungkua, khawtlang, ram leh hnam hmasawn nana hmanraw pawimawh berte zing ami a nih thu a sawi. Zirtirtute Ni chu naupang, nu leh pa leh puitlingte pawhin zirtirtute min enkawlna ah lawmthu sawi let vena ni angin hmun hrang hrangah an hman thin thu a sawi a, kawng hrang hrangin zirtirtute chawimawina an lantir thin thu a sawi.

Kolasib district-a Teachers’ Day lawmna kalpui thin dan thlirletna hun hman niin School hrang hrangah mahni remchan dan a zirlaite leh zirtirtuten hun an hman dan te ngaihthlak a ni a, tlawmngai pawl hrang hrangte nen thawhhona tha lehzual a Teachers’ Day lawmna kalpui dan tur te sawi ho a ni.

MLA inthlanpui buatsaih kum a nih angin Teachers’ Day lawmna ni ah hian zirtirtute leh zirlaite tan ‘Voters’ Pledge’ sawi rualna hun kalpui dan turte rel a ni bawk.