Teachers' Day vawi 55 na chu vawiin khan Kolasib District khaw tinah ropui taka hman a ni.

Zirtirtu te ni hmandan tur Deputy Commissioner Pu H.Lalengmawia hova 17th August, 2016 a lo rel tawh angin, vawiin Zirtirtute Ni hi Kolasib Districtah chuan khaw tinah hman a ni a. He ni hi zirtirtu te chawimawina ni atan mai bakah Kolasib district-in zirna in hma a sawn a, thalai hlawhtling leh chhawr nahawm chherchhuah a nih zual theih nana infuih tharna atan leh hemi kawngah zirtirtu te mai bakah nu leh pa, khawtlang hruaitute leh zirlai te tanho a tul zia in hrilhriat nana a hman a ni a. Kolasib district a sorkar official te, zirna tihhmasawnna atana mi thahnemngai leh prominent citizen ten khaw tinah hun hmangin an insemdarh a, veivahna senso pawh hi mahni intum chawp vek a ni. Khaw tinah hian Village Council ten hun hmanna tur hi lo huaihuatin zirtirtu te, zirlai te, nu leh pa leh khawtlang hruaitute kohkhawm an ni.

Kolasib District in zirna a hma a sawn nan Deputy Commissioner hovin Edcucation Campaign school-ah neih thin a ni a, heng hmalakna avang hian Education Dapartment, Mizoram atang Appreciation Letter a dawng nghe nghe a ni.