No.7428/2020-2021

Vawiin khan Kolasib Bawrhsap Dr. H.Lalthlangliana'n S.Chhimluang khua a tlawh a, khawtlang tihhmasawnna tur a an mamawh te sawipuiin an khaw panna kawng siamthat ngai te a endik a, kawlphetha lam a harsatna an lo thlen te chinfel dan tur a enfiah nghal bawk a ni.

Kolasib Bawrhsap Dr.H.Lalthlangliana chuan S.Chhimluang khawtlang hmaah thu sawiin S.Chhimluang khua chu hmasawnna rahbi thar kai mek, Sub-village dinhmuna hlan kai thar an ni ta chu a tak a khawtlang hmasawn nana hmang ngei turin a chah a, hemi tihlawhtling tur hian khua leh tui rintlak nih tum tlat a pawimawh thu leh kawng hrang hrangah kohhran rawngbawltute leh school-a thawktute pawh rawn hreh lo turin leh rawn nachang hre turin a chah. Bawrhsap chuan S.Chhimluang chu khaw entawntlak a nih theih nan faina kawngahte, ruihhlo do kawngahte leh zirna kawngahte tan la zel turin a fuih a, khawtlang tihhmasawnna tur chuan a chhunga chengten neitu nihna thinlung an put hmasak a tul thu a sawi bawk a ni.

Pu. ST Lalhmingmawia, DLAO chuan Sub-Village Council Committee mawhphurna leh inkaihhruaina kawnga hriattur pawimawh sawina hun a hmang a, Sawrkara innghat mai lovin, mahni phak tawk a khawtlang tan a mi tangkai nih tum theuh turin kalkhawmte a chah bawk a ni.

Kolasib Bawrhsapin S.Chhimluang a tlawhnaah hian S.Chhimluang field-ah vantlang inkhawm buatsaihin an lo lawm a, Pi. Laldawngliani Zote, Head Mistress, Synod Mission School in he hun hi kaihruaiin khawtlang mamawh hrang hrang sawihona hun hman a ni a, hnam lam te entir a ni bawk.

Bawrhsap hi Pu. Benjamin Lalzama, PD, DRDA, Pu. Lalzarliana, EE, P&E, Pu. ST Lalhmingmawia, DLAO leh Officer dangten an tawiawm a. Kawlphetha lam a harsatnate leh Pangbalkawn atanga S.Chhimluang panna kawng siamthat ngai lai te an endik nghal bawk a ni.

S.Chhimluang khua hi Kolasib khawchhung atangin km 33 vel a hla a ni a, Chhungkaw 126 awm anga chhut niin a tam zawk hi Bru an ni a, December 2020 khan Sub-Village council a hlan kai an ni.