1038/2023-2024

Kolasib dated 5th July 2023: Vawiin chawhma khan DC Conference Hall, Kolasibah 2nd Special Summary Revision of Electoral Roll, 2023, Electoral Roll ennawn, siamthat leh tlangzarhna tur a inbuatsaihna kalpui mek a Booth Level Officer-te tan training neih a ni a. Pu John LT Sanga, Deputy Commissioner chuan Training hawnna hun a hmang a, Pi Christina Lalmuanzuali, Election Officer-in hun kaihruaiin Pu Neng Thianlala, SDO (C), Vairengte, State Level Master Trainer chuan Training hi a pe a ni.

Pu John LT Sanga, Deputy Commissioner chuan inthlanna felfai leh langtlang a awm theih nan ram kaihruai tur a mipui aiawh thlanchhuah kawng a mawhphurhna pawimawh tak tak kengkawhtu chu Booth Level Officer-te an nih thu a sawi a. Election Commission of India in ram chhung a inthlanna kalpui dan tur chungchanga zawm tur inkaihhruaina hrang hrang a tihchhuahte zir chiang a, hre bel hle turin a chah a ni. Inthlang tur a Kolasib district-a inpuahchahna kalpui dan tlangpui DC chuan tarlangin EVM endikna hmasa kalpui tawh a nih thu te, venhimna tha tak hnuai ah chung EVM te chu dah a nih thu te, Vote tla zat chhiarna tur hmunhma ruahman a nih thu leh Polling Station endik leh a tul anga thawmthat a nih thu a sawi bawk a ni.

Pu Neng Thianlala, SDO(C), Vairengte chuan khawpui pawn ah mihring 1200 awmna leh khawpui chhung a mihring 1400 awmna zel ah Polling Station ruahman a nih thu te, Voter-te tan pan harsa tur a nih loh thu leh 2 km aia hla lo tur a ruahmanna siam tur a nih thu a tarlang a. Electoral Roll-a hming paih, hming thlak leh siamthat, EPIC bo leh chhiat vanga a thar, Form hrang hrang hmang a dil dante tarlangin BLO Apps leh NVSP apps hman dante Training-ah hian a tarlang bawk a ni.

Vawiin Training-ah hian Kolasib District chhunga 4-Tuirial, 5- Kolasib leh 6-Serlui Assembly Constituency chhung a Booth Level Officer 89, Electoral Registration Officer leh Assistant Electoral Registration Officer-te an tel a ni.